Shillong, Kyllalyngkot 16 : Ka Meghalaya ka la pynliem da ka inning bad 206 ron ïa ka Baroda ha ka lympung ïalehkai U-25 Col CK Nayudu Trophy ha ka jingïalehkai hynne ka sngi Nyngkong ha Mangaldai, Assam.
Ha kane ka sngi, ki don haduh arphew ngut kiba la shah pynhap wicket bad baroh kidei jong ka Meghalaya.
Ha ka por mynstep, ka Baroda haba bteng biang ïa ka 273/5 ha kaba ka Meghalaya ka la lah ban ïalehkai bha ha ka liang ka kawang bol bad ka la ïoh ban pynhap ïa ki san wicket ba dang sah bad ka Baroda ka la shah pynhap lut baroh ki wicket da kaba kamai 336 ron.
U Manish Sharma, uba shim ar wicket ha ka sngi sdang, hynne ka sngi u la ïoh biang sa ar wicket bad pyndep ïa ka jingïoh khur wicket da 4 wicket ai kamai 90 ron, katba u PM Santhosh u khur 3 wicket ai kamai 57 ron. U la ïoh ban khur shi wicket ha ka sngi sdang, kum u Roshan Warbah (1/28) bad u Ram Gurung (1/36). U Aryan Bora u ïoh (1/76).
Ha ka inning kaba nyngkong ka Meghalaya ka la khyllem lut baroh ki wicket bad kamai 111 ron, ki lai ngut ki rangtied ki khlem ïoh kamai ron katba ki saw ngut kiwei pat ki la ïoh ban kamai ron ha kaba u Jaskirat Singh Sachdeva udei uba kamai bun ron da 30 ron. U Jaskirat Singh Sachdeva bad u Kevin Christopher (25) ki la buh da 59 ron ha ka jingduh noh ba saw wicket hadien ba ka Meghalaya ka la shah pynhiar kamai da 7/3 hynrei hadien kane ka la shah pynhap lut baroh ki wicket. U Sharma u kamai 21 ron bad u Gurung 14 ron ka la ai jingkyrmen ïa ka kynhun ban khur jingjop.
Da kaba lamkhmat da 225 ron ha ka inning kaba nyngkong, ka Baroda, ka la ïakhun tyngeh ban bad ka Meghalaya ka la shah pynhap lut baroh ki wicket da kaba kamai tang 19 ron. Dei tang u Roberth Sangma uba kamai bun ron da 10 ron.
Ka Meghalaya kan pynkhreh ban ïakhun ïa ka Himachal Pradesh ha ka 29 tarik Kyllalyngkot 2023.
