Shillong, Kyllalyngkot 24: Ka long ka jingïakhun kaba jwat ïa ka Meghalaya hynrei watla kata ruh ka la lah ban ïakhun tyngeh ban pynliem ïa ka Mizoram da 3 wicket ha ka sngi ïakhun ba saw kaba dei artad kaba khadduh hapdeng jong ki ha ka lympung U-23 men’s Col CK Nayudu Trophy kaba la long ha Nadiad, Gujarat, hynne ka sngi.
Sa shi sien pat u Kevin Christopher kum u kapten ka kynhun, watla u khlem shym la kamai bun ron ha kane ka sngi, hynrei ki 40 ron kiba u la tied (not out ) ki la la biang ïa ka kynhun ban jam sha ka namjop.
Kumban shu pynkynmaw, ka Meghalaya ka la khanglad ïa ka Mizoram da tang 220 ron ha ka inning tied ba nyngkong bad ka la jubab da kaba tied 259 ron. Hadien kane, ka Meghalaya ka la lah ban pynhap baroh ki wicket jong ka liang pyrshah da tang 232 ron ha ka inning kaba ar, ha kaba ka jylla ka donkam ban tied 194 ron ban khur ïa ka namjop, ïa kaba ka kynhun ka la lah ban pyndep bad hap tang 7 wicket.
Haba bteng ïa ka jingïalehkai na ka 30/2, u Nishanta Chakraborty (39 ron naki 134 bol) bad u Bipin Kumar Ray (26 ron naki 80 bol) ki la lah ban kyntiew 59 ron ryngkat shuwa ban shah pynhap u wicket ba lai.
Hynrei, watla ki rangtied ka jylla ki la lah ban kamai katto katne ron, ka Mizoram ka la ïai bteng ban don jingkyrmen ha ka jingïakhun da kaba khur wicket wei hadien u wei.
Ha kaba kut ka Meghalaya ka pyndep ban kynjoh pura ïa ka thong ba la buh, bad ki rangtied kiba la neh bad ïalam ïa ka kynhun sha ka namjop ki long u PM Santhosh (13 ron naki 28 bol), ryngkat bad u Kevin.
Haba phai sha u Kevin, u ba la khyrwit ar tylli ki spah ron ha ki jingïakhun ba ladep, mynta u don lang ha kajuh ka thup kyrdan ba saw ha ka ri, da kaba kamai 423ron naki lai sien ïakhun.
Haduh mynta ka Meghalaya ka la jop baroh lai sien ki jingïakhun bad ïakhaid bad ka Nagaland da 19 point. Ka kynhu Meghalaya kan wanphai shala ïing ban pynkhreh aireng pyrshah ïa ka Arunachal Pradesh ka ban sdang naduh ka 28 tarik mynta u Kyllalyngkot.
