Nongstoiñ, Nailar 14: Ka jingbym shimkhia jong ka Bharat Sanchar Nigam Limited, ban maramot ïa u tower ba ka la wan pynïeng ha ka shnong Sangriang, na ka bynta ban ai ka jingshakri ïa ki paitbah ka thaiñ, ka la wanrah ïa ka jingduh kaba khraw ïa ki paitbah jong ka thaiñ, ong ki nongïalam ka FKJGP Nongkhnom circle.
U bah Ïoanis Ïawlar secretary ka seng haba ïakren bad u nongthoh khubor, u la ong ba utei u tower u la sniew la bun bun bnai. Hynrei ka ophis jong ka BSNL kam shym la shimkhia satia ban wan maramot, wat haba ki paitbah bad ki rangbah shnong ki la leit ud man ka por bad kyntu ïa ki nongtrei ha katei ka ophis ba kin leit maramot noh.
Utei u nongïalam ka seng u la ong ruh ba ha u bnai Jymmang jong une u snem, na ka liang ki nongïalam ka seng ryngkat bad ki rangbah shnong, ki la leit ban ïakynduh ïa u Sub Divissional Engineer jong katei ka tnad treikam ha Nongstoiñ, ban kyrpad ïa u ba um phah pynbiang noh ïa utei u tower bad ki la ai ruh da ka jingthoh, hynrei haduh kine ki sngi ka ophis kam pat lah ban pynbiang.
Nalor kata, u la ong ruh ba ym tang ha katei ka sien ba ki leit ban ïakynduh, hynrei naduh kham mynshuwa ruh ki la leit la bun sien bun wat.
