Shillong, Rymphang, 16: Ki nongïalam jong ka Education Cell ka Khasi Students Union (KSU) ha ka sngi Thohdieng ki la ïakynduh ïa u Myntri ka tnat Pule Puthi u Rakkam A. Sangam ban pynsngew halor ka jingpynslem jong ka Sorkar Jylla ban pyllait ïa ka baibam lane ka Scholarship jong ki samla pule na ka bynta u snem 2022-2023
Ha ka jingïakren bad ki lad pathai khubor u Asst Education Secretary ka KSU u samla Richest Malngiang u la ïathuh ba kane ka jingpynsngew jong ka seng sha u Myntri ka tnat Pule Puthi ka long namar ka jingïohpdiang ïa ka jingud jingnam na kiba bun ki samla pule halor ka jingpynslem jong ka Sorkar ban pyllait ïa ka Scholarship bad don ruh kiba ym pat ïoh ïa ka Scholarship haduh kine ki sngi.
Ka jingbym ïoh jong ki samla pule ïa ka Scholarship na ka bynta ka shisnem ka la buh jingeh ïa ki bad khamtam eh na ka bynta ki samla pule kiba wan na ki longïing kiba kham duna ha ka ïoh ka kot namarba ka ladei ruh ka por ba ki hap ban siew ïa ka bai klas na ka bynta u snem 2024.
Na ka liang jong u Myntri ka tnat Pule Puthi u la kular ban shimkhia bad ban pynbeit mardor ïa kane ka kam bad u la kyntu ba ki samla pule ki bym pat ïoh ïa ka Scholarship ki dei ban leit mih sha ka ophis treikam jong u Director ka tnat Higher & Technical Education ïohba ka don ka jingthud na ka liang jong ka ophis.
