Nongpoh, Ïaiong 07: Ka jingbym biang ka rukom pynioh um lyngba ka tnat PHE sha ki longiing ha kiba bun ki shnong katkum ka kyndon jong ka Jal Jeevan Mission (JJM), ka la pynlong ïa ka Confederation of Ri Bhoi People (CoRP) ban lum syndon da ka Central Executive Committee ha ka 5 tarik Ïaiong, 2025, ban pyrkhat bad ban pynlong da ka jingjurip sha ki shnong kiba mad ïa ka jingkyrduh um.
U President rangbah katei ka seng, u Bah Bandari Ryntathiang, haba kren sha ki lad pathai khubor, u la ong ba ka seng nalor ka jingjurip, kan thoh ruh ïa ka jingujor sha ka sorkar jylla bad sorkar India kiba dei peit ïa kane ka bynta ba kin jurip bad wad ïa ka daw balei katei ka jingtyrkhong um ka jia ha ki shnong ki thaw.
U la ong ruh ba kum ka seng ka dap da ka jingsngewkhia kaba jur halor ka jingeh ba mad bun tylli ki shnong ha Ri Bhoi naka jingkyrduh um watla ka sorkar kala pyntreikam ïaka skhim JJM, hynrei bun ki longiing ki ioh tang u pipe ba khlem um.
Halor katei ka jingkyrduh um naka liang ka seng kan pynlong da ka jingjurip salonsar haki shnong ba mad jingeh bad kyrpad ruh ïaki shnong ba kynduh kum katei ka jingeh ba kin pyntip sha ka seng ba kan ioh ban leh ïa kaba donkam khamtam ban tied ïaki skhor ka sorkar jylla bad kumjuh ruh ka sorkar pdeng.
