Bym ithuh shuh ka Sorkar ïa ki Sponsoring Body hiar dor ka pule puthi, kam u Bah H.S.Myrthong

Nongstoiñ, Jylliew, 30: Ka jingbym ithuh shuh jong ka sorkar ïa ki sponsoring body kiba pynïaid ïa ki skul, ka la buh jingeh haduh katta katta lada don ki nonghikai, kiba khlad noh shiteng por, kiba la tymmen palat bad kiba la ïoh rung kam noh sha wei pat, wat la ka mang pisa na ka bynta ban siew tulop ïa ki nonghikai, ong u bah Hopestandard Myrthong secretary barim jong ki skul SSA haba ïakren bad u nongthoh khubor.
U bah Myrthong u la ong ruh ba katei ka jingleh ka sorkar ka long pynban ka lad ban pynshlur pynban ïa ka bamsap bam pong hapoh ka jylla. Nalor kata u la ong ruh ba haduh mynta ka Education policy ba ka sorkar ka pyntreikam ka dei kaba la shu bud tynneng ïa ki policy kiba na shawei pat, ym kiba ka sorkar jylla ka thaw hi bad dei na katei ka daw ba ka pule puthi ha ka jylla ka hiar dor katba nagmih ki sngi.
U la ong ruh ba ka sorkar ka la shu hukum beit ïa baroh ki nongpynïaid skul ba kin pyndep ïa ki paper work, kum ha kaba pynbit pynbiang ïa ki jingthoh jingtar bad ki jingkheiñ jingdiah kiba ïadei bad ka mid day meal jong ki khynnah, ki attendance, khlem da bishar bniah ba haduh katno ki nonghikai ha ki nongkyndong ki shem jingeh namar ka jingbym biang ka network.
U la bynrap ruh ba haba peit ïa ki khynnah skul khamtam kito kiba dang rit ka karta, tang ïa ka pla kot ruh kim lah ban kit namar ba la bun than ki kot pule bad teng teng la idei ba ïa ki pla kot la hap ban phah kit syndon da ki daju kumba kit mar ha ïew.
U la ong ruh ba haba u ïa nujor ïa ka rukom hikai jong ki babu kiba mynshuwa eh bad ki babu kiba hikai ha kine ki sngi, khamtam eh ha ka sobjek Jingkheiñ, history bad geography, ka rukom hikai ka da pynproh jabieng bad pynïar ïa ka jingnang jingtip la ka dei ha kaba kheiñ ba diah, ha ka jingtip ïa ki khana bad ki jinglong jingman ha ki por ba rim bajah, ha ka jingtip ïa ki lum ki wah, ki shnong I thaw, ki jaka ki puta bad ka jinglong ka mariang.
Hynrei ka rukom hikai jong ki babu ha kine ki sngi ka long lada ïa ka sojek jingkhei la dep thoh lypa ter ter ïa ki number ban kheiñ bad shu phah thoh tang ïa ka jubab.
Haba peit ïa ka sobjek history lei lei la ithamula, namar ba ha ki kot history kiba mynshuwa ka lynnong kaba don saw haduh san peij ha ka history ba mynta pat tang shi peij ruh kam dap bad ka long kumjuh ha ka geography bad ki sobjek baroh.
Ha kaba ïadei bad ka pule puthi u bah Myrthong u la ong ruh ba ka sorkar ka la dei ban lumlang ïa baroh hynriew phew ngut ki nongmihkhmat ban shna thymmai ïa ka Education policy, ka ban ïadei dur bad ka pule puthi bad ban pynim biang ïa ki Board ban pynïaleh ïa ki Eksamin kut snem kumba mynshuwa, kata kiba dei ban ïeh ha ka Board ki dei ki klass III klass VI bad klass X.
U la ong ruh ba ka rukom phah skul mynta ka long ba baroh ki khynnah kiba la dap hynriew snem lada ki pheil ha ki examin kut snem ruh, ki dei ban pynkiew beit sha ka klass IV bad ki khynnah kiba la dap khatar snem pat, lada ki pheil ha ki examnin kut snem ruh ki hap ban pynkiew beit sha ka klass VII bad imat dei na kitei ki daw ba ka pule puthi ha ka jylla ka hiar dor haduh katne.
Nangta u la ong ruh ba ka sorkar ka dei ban ai jingïarap sha ki skul bad ki sponsoring body, lada ki pan lada ki don ki jaka kiba bit ba biang kiba la pynshisha ruh da ki dulir ryngkat ka jingphah thew GPS bad Code No. bad ba ki sponsoring body kin buh ruh da ki nonghikai kiba biang, ha kaba ka sorkar kan bishar ruh kat kum ki resol kiba mih na kino kino ki bha bad ki juh ka result kan neh kumba lai snem. Kiba kum kitei ki skul ki dei ban ïoh jingïarap da ki grand ba bun jait bad lehse ka pule puthi ha ka jylla, kan sa kiew arted ym ba kan hiar arsut kumba ka long mynta.