Buh mawnongrim u Conrad Sangma ban plie ïa ka C&RD Block, u Bah HG Passah kum u BDO

Nongstoiñ, Nohprah, 20: U Myntri Rangbah ka Jylla u Conrad Kongal Sangma ha ka Sngi Baar ula hiar sha ka shnong Shahlang ban plie ïa u mawnongrim jong ka C&RD Block ba thymmai.
Ha kane ka sngi, da ki hajar ngut ki paitbah jong ka thaiñ ki la tuid sha ka jingïalng plie mawnongrim kaba la pynlong ha madan phut bol ha Songsak.
Ia u Myntri Rangbah la synran lang da u MLA ka Mawshynrut Constituency u Bah Gigur Myrthong , u Addl. Deputy Commissioner jong ka West Khasi Hils District u Bah Kerwood Thabah uba long ruh u Sub Divissional Officer (SDO) jong ka Mawshynrut Civil Sub-divission , u Project Director jong DRDA West Khasi Hills u Bah V.Swer bad kiwei kiwei de ki ophisar na ki tnad trei kam jong ka District.
Tang shu poi ha katei ka madan la pdiang burom ia u Myntri Rangbah da ka kynhun shad tynrai jong ki Garo na katei ka thaiñ kaba la pynshongshit puk ïa ki paitbah.
Ha shwa ban plie ïa u mawnongrim la ïoh ka jingkren na u Bah Gikur Myrthong uba long ruh u Symbud Kongsan ha kaba u la ong ba ka jingïatreilang jong ki paitbah ka thaiñ bad u MLA ha kine ki saw snem ka la long ka jingkyrkhu kaba khraw ïa ka Constituency bad ïa ka West Khasi Hills baroh kawei.
U la ong ruh ba ha kine ki sanphew snem ba la leit noh ki Sorkar ki wan bad ki leit bad khamtam ha shuwa u snem 2018 ka Congress ka la ïalam ïa ka Sorkar la bun bun snem hynrei ym don satia ki kam pynroi kum ki surok bad kiwei kiwei.
Nalor kata u la ong ruh ba naduh ba u la shah jied kum u Nongmhkhmat lyngba ka jingtrei shitom jong u ka roi ka par ka la kiewsted ha baroh ki liang namarba ka sorkar MDA ba la ïalam da ka NPP ka ieit kyrpang ïa ka West Khasi Hills.
Shwa ba u Myntri Rangbah un plie ïa u mawnongrim, la pule ïa ka Notification kaba la soi da u Lat ka jylla da u Bah V.Swer bad hadien ba la dep pule la plie ïa u mawnongrim jong ka Block bad la pynbna ruh ba la thung ïa u Bah H.G Passah kum u Block Development Officer (BDO) jong ka Shahlang C&RD Block.
U Myntri Rangbah ka Jylla haba kren ha kane ka jingïalang u la pynshai ha ki paitbah ba ka jingplie ïa ka Block ophis ha Shahlang ka long na ka bynta ban pynsuk ïa ki paitbah bad ban pyntyllun sted ïa ki jingïarap ba ka sorkar ka la mang na ka bynta jong baroh ki nongshong shnong.
U la pynshai ruh ha kaba ïadei bad ka jingsam ïa ka skhim FOCUS sha ki nongrep kiba la rejistar ïalade bad kiba la ithuh da ka sorkar.
Shuh shuh u la pynshai ruh ba ki nongrep kiba lah ban ïoh ïa ka skhim FOCUS ki hap ban rejistar bad ki hap ban pynshisha da ka EPIC, ka Bill Light ,Adhaar Card khnang ban ïoh beit ïa ki jingïarap.
Ha kane ka sngi la sam ruh ïa ki khun sniang bad ki khun syiar sha ki nongshong shnong kiba la dep rejistar kyrteng ha ka FOCUS.