Buh mawnongrim u Bah Renikton ïa ki 8 tylli ki skhim surok ba kot haduh T. 23 klur ha Mawkyrwat Constituency

Mawkyrwat, Nohprah 20: U nongmihkhmat ka Mawkyrwat Constituency bad kum u Myntri ka tnad umbam umdih jong ka sorkar Meghalaya, u bah Renikton Lyngdoh Tongkhar mynta ka sngi ula ïoh ba plie ïa ki 8 tylli ki mawnongrim jong ki skhim ban shna ia ki surok kiba hapoh ka Mawkyrwat Constituency kiba ka jingmang pisa ka kot haduh T. 23 klur tam ha ryngkat ka jingïadonlang jong u Executive Engineer ka PWD (Roads), u bah David M. Pyngrope.
Ki mawnongrim kiba la ïoh ban plie mynta ka sngi ban shna ïa ki surok ki dei ha ki ar tylli ki divisions kata Mawkyrwat bad Mawsaw kiba dei jong ka PWD (Roads) bad lah ruh ban kdew ba hangne ba kitei ki skhim ki kynthup ïa ka surok na Nongdiat sha Nongsynrieh kaba 1.6 km, ka surok na Kremsaitsnier – Mawduhsanshnong haduh Pyndenmawramhah kaba 2.3 km, ka Internal Road ha Nongsynrieh kaba 1.6 Km ha kaba pynkhreh ïa ka Jingïaseng KJP Synod jong u snem 2022 ha Nongsynrieh, ka jingshna ïa ka surok na Mawlangwir sha Mawmerang ha ka jingjngai kaba 3 km ba la pynïaid lyngba ka RIDF –XXVI.
Nangta, ka jingshna bad jingsiang rong ïa ka surok kaba la dam na Shadmoit sha Sohma I/C Bridge (1.40 km), ka jingshna ïa ka surok na shnong Pyndendiwah sha Laitnongrim ha ka jingjngai kaba 1 km kynthup ïa ka jingkieng kaba 12 meter ka jingïar, ka jingpynbha bad kaba siang rong ïa ka surok Umjaraiñ sha Lawblei ha ka jingjngai kaba 3 km, ka jingpynbha bad kaba siang rong ïa ka surok kaba rung shapoh shnong Maw-langwir ha ka jingjngai kaba 1.66 km.
Shuh shuh kaba maramot ïa ka surok Mawthawpdah haduh Phlang-diloiñ kumba 5 km ha ki bynta ba 38th, 39th, 40th, 46th, & 49th km ha kaba pynryntih bad pynbud sa ka 20 MM PMC bad Seal Coat bad ka jingmaramot ïa ka surok Laitmawsiang sha Mawthawpdah haduh Phlangdiloiñ ha kaba pynryntih bad PMC, Seal Coat bad kiwei kiwei ha ki bynta naduh 32 – 37 km, 41 – 43 km bad 45 km ha ka jingjngai kaba 10 km na ka bynta ka jingpynkhreh ïa ka KJP Synod ha Nong-synrieh bad Mawsaw.
U bah Renikton Lyngdoh Tongkhar haba kren ha ka jingïalang u la pynpaw ka jingaikhublei nyngkong eh na ka bynta ki nongtrei jong ka ophis PWD (Roads) kiba la trei shitom ban pynurlong ïa kane ka sngi kaba kmen bad ka jingphohsniew jong ki paidbah ka dong ka thaiñ. Ha kajuh ka por u la pyntip ruh ba ha kane ka jingplie ïa ki mawnongrim ki don baroh 8 tylli ki skhim ban shna ïa ki surok ha kylleng ki jaka jong ka Mawkyrwat Consti-tuency kata 4 tylli kiba hapoh ka PWD (Roads) Mawkyrwat Division bad 4 tylli pat hapoh ka PWD (Roads) Mawsaw Division khnang ba ki paidbah kin ïoh jingmyntoi ha ka leit ka wan.
U pyntip shuh shuh ba nalor kitei ki 8 tylli ki skhim ki don sa kumba 14 tylli kiba dang ap ka jingmang pisa bad kiba la khmih lynti ban pyntrei kam noh shen. U la ong ruh ba Intermediate Road na Lad Mawreng sha Weiloi kaba dei ha ka Phase-I la dei ban mangpisa bad la khot ruh ïa ki nongpyntreikam. Namarkata, u la khot bad wer ïa ka jingïatreilang na ki paidbah khnang ba lah ban wanrah ïa ka roi ka par ha baroh ki liang ha ki por ki ban dang wan da kaba kyrpad ruh ïa ki nongpyntrei ne ki contractor ba ynda ki la shimti ïa ka kam ki dei ban pyntrei kam hok bad ban pyndep ruh ha ka por ba la buh khlem pynsah teng khnang ba ki lad pynroi kin ym long leh noh ei.
Kham ha shwa, u bah S.I. Laso, Assistant Executive Engineer PWD (Roads) Mawkyrwat Sub Division u la ai ki kyntien pdiang sngewbha katba u bah G. Shangdiar, Assis-tant Engineer, Mawkyrwat PWD Division u la ai ki kyntien khublei.