Shillong, Lber 08: U Myntri Rangbah ka Jylla, u Conrad K Sangma, hynne ka sngi, u la buh maw nongrim ban shna ïa ka madan Futsal Playground ha Lower Mawprem, ha ka jingïadonryngkatlang u Myntri ka tnat Sports, u Bah Shakliar Warjri lem bad u Myntri ka Tourism-u Bah Paul Lyngdoh.
Haba ai jingkren ha kane ka jingïalang, na ka liang jong u MR ka jylla, u Conrad K Sangma, da kaba kdew ba kane ka sorkar ba mynta ka la trei shitom bha ban kyntiew ïa ki samla ka thaiñ, bad kawei na ki lad ka long lyngba ka Sports kaba long kawei na ki kabu kaba lah ban kyntiew shaphrang ïa ki samla ka jylla.
“Ha kine ki khyndiat snem ba ladep ka sorkar ka la theh haduh 700 klur ban pynbit pynbiang ïa ki jingdonkam jong ka sport bad kumba 300 tylli ki jingtei kiba ka sorkar ka tbmu ban pynïeng ha kaba 122 tylli ki project la ïoh ban pyndep ha kine ki lai snem,” u la ong. U la bynrap ruh ba 20 tylli ki dei ki madan ïalehkai Futsal kiba yn sa pynïoh hapoh ka jylla.
Shuh shuh, u MR u la ong ba ka sorkar ka la shimkhia ban wanrah ïa ki rynsan na bynta ki samla ka thaiñ da kaba pynlong ïa ki prokram bapher bapher kum ka Skills Meghalaya, YESS Meghalaya, PRIME, CM Elevate bad kiwei kiwei.
U la pynbna ruh ba ka jingthmu ban tei ïa ka Mawkhanu Sports Complex kaba la mang 350 klur kan sa nang kyntiew kham shaphrang ïa ka Sport hapoh ka jylla. “Da kaba tei ïa ka Mawkhanu Sports Complex, ka jylla kan sa lah ban pdiang bad pynlong ïa ki rynsan kiba dei jong ka national bad ruh international,” he said.
U la bynrap ruh ba lyngba ka STAR Program Talent Scouting ngin ïai bteng bad kin dang shibun ki rynsan ban pynpaw bad kyntiew ïa ki nongïalehkai na bynta ka 6th Meghalaya Games ka ban long ha Jowai bad ruh na bynta ka National Games ka ban sa long ha kine ki snem ban dang ïaid.
