Shillong, Lber 08: Ha ka jingsnohktilang bad ka pyrthei shi tyllup ban rakhe ïa ka International Women’s Day, ka tnat Social Welfare jong ka Sorkar jylla Meghalaya ha ryngkat ka jingïatreilang bad ka State Hub for Empowerment of Women bad ka Meghalaya State Rural Livelihoods Society ka la rakhe ïa ka International Women’s Day ha State Convention Centre, Shillong.
Ha kum kane ka sngi kynmaw burom na bynta ki kynthei na ka liang jong ka Social Welfare ka la ïoh ban pynkupburom ïa katto katne ki Kynthei kiba paw ha ki kyrdan bapher bapher, bad arngut napdeng kine ki dei kiba pawkhmat ha ki kam ïalehkai, ba kynthup ïa ka Kong Kmoin Wahlang bad ka Bonifilia Shullai.
Khyndiat shaphang ka Kong Kmoin Wahlang, ka dei ka nongïakop mareh thong ba la tymmen na Shillong bad kaba la hap ruh ha ka thup kiba la tymmen tam ha India, hynrei wat hapdeng ka jinglong tymmen kam shym la khanglad satia ïa ka ban shimbynta ha ki jingïakop mareh kiba ju pynlong barabor ha Shillong.
Ka Kong Kmoin Wahlang ka dei ka kmie jong 12 ngut ki khun, bad don ïa ka jingshitom ha ki bynta jong kpoh, hynrei watla kata ruh, kane kam shym la pynsangeh ïa ka ban shimbynta ha ki lympung ïakop mareh.
Katba ka Samla Bonifilia Shullai, ka dei ka thei ïalehkai phutbol kaba la pynsngew sarong ym tang ïa ka jaid bynriew hynrei ïa ka jylla hi baroh kawei hadien ba ka la shah jied ha ka kynhun India na bynta ka SAFF U-16 Women’s Championship ha Nepal kaba dang ïaid mynta.
Ha u snem 2022, ka la don bynta bad ka kynhun U-15 jong ka Bengaluru FC bad mih madan ruh na ka Garhwal FC ha ka Football Delhi Women’s Premier League.
Ka Bonifilia ka la ïoh ruh ban thep ïa ka kol kaba nyngkong na bynta ka ri ha ka jingïalehkai kaba long pyrshah ïa ka Nepal, ha kaba ka India ka la pynbam kput haduh 10 kol ban ïoh rung sha ka final.
Ka Kong Kmoin Wahlang ka la pdiang ïa ka khusnam pynkup burom na ka Kong Ampareen Lyngdoh kaba la wan kum ka kongsan ha kane ka sngi ryngkat bad ka Santa Mary Shylla kum ka symbud kongsan, katba ka Bonifilia Shullai kam shym la lah ban don ryngkat namar ka don shabar bad ka kynhun India, ka ban sa ïakhun pyrshah ïa ka Bangladesh ha ka final lashai ka sngi ha Nepal.
