Shillong, Nailar 01: U Commissioner & Secretary ba khmih ïa ka tnat Transport Sanjay Goyal ha ka sngi Palei u la ong ba katkum ka bor ba la ai ha u hapoh ka Section 113 jong ka Motor Vehicles Act, 1998 kaba pule bad ka kyndon Rule 95 jong ka Central Motor Rules 1989, ka sorkar jylla ka la pynmih ïa ki jingbthah bad kyndon kiba kongsan haba ïadei bad ka jingplie biang ïa ka Umiam Dam Bridge na ka bynta ka jingïaid jong ki kali kaba long katkum ka jingkhia bad ruh na ka bynta ki jingïada bad sumar ïa ka jingkieng.
Ha kane ka jingpynbna la ong ba tang ki kali kiba jrong haduh 2.8 metre la shah ban ïaid najrong ka jingkieng, bad tang ki kali Single axle kiba khia kynthup lang ïa ki jingkit kiba ym dei ban palat ïa ka 9 (nine) metric ton la shah ba kin ïaid najrong ka jingkieng.
Kane ka hukum kan treikam noh mardor tat haduh ban da la pynbna da kumwei pat.
