Nongpoh, Nailar 23: U Union Minister of State for Roads, Transport and Highways u Ajay Tamta mynta ka sngi ula hiar sha Ri-Bhoi ban buddien ïaki kam pynroi hapoh ka NITI Aayog Aspirational District Programme haka jingdonlang ki Additional Deputy Commissioner, ki ophisar naki tnad sorkar bapher bapher.
U Myntri ka sorkar pdeng u la leit jngoh ruh ïa ka Umsaw Nongkharai Health and Wellness Centre ha ka shnong Umsawnongkharai, ka Iew Lay-bye ha Dulongnar bad ïa ka rep sohtrun ha ka shnong Nongkhrah ha kaba u la ioh ruh ban ïakren bad ki nongïoh jingmyntoi halor ki jingeh ba ki kynduh bad ki jingmyntoi ba ki ioh naki skhim sorkar.
Utei u myntri u la shong ruh haka jingïalang kaba la pynlong ha Conference Hall jong u Deputy Commissioner ka Ri-Bhoi ha kaba naka liang u Raja Brahma Project Director ka DRDA ryngkat kiwei kiwei ki ophisar kila ai ka jingbatai halor ki kam ba dang ïaid shakhmat kum ka koit ka khiah, ka pule puthi, ka rep ka riang, bad kiwei kiwei kiba la pyntreikam hapoh ka Aspirational District Programme bad kiwei pat ki skhim ba la kyrshan da ka sorkar pdeng.
Na ka liang utei u myntri u la ai mynsiem ruh ïaki ophisar ban nang trei shitom shuh shuh ban don ka mynsiem ban kynjoh sha ka thong ha kaba ïadei bad ki kam pynroi.
