Buddien ka JNC na u CGM ka NHAI halor jingbym maramot ïa ka surok NH-6

Khliehriat risaw 12: Ha kaba ïadei bad ka jingbym maramot ïa ka surok kaba la jot rathai, ka Jaiñtia National Council, ka la ujor bad bud dien na u CGM HR Admn. Coord jong ka National Highway Authority of India, u Sunil Prakash Bhardwaj bad ka seng hynnin ka sngi ka la ioh pdiang ruh ïa ka kaiphot na utei u heh jong ka NHAI, ha kajuh ka por ka seng ka la ong ruh ba ‘Ka jingbym shim khia ka NHAI ban maramot ïa ka surok ka pynkylla sohpdung ïa ki paidbah’.
Ka seng ka la pynpaw ka jingsngew khia halor ka jingsniew palat ka surok national highway kaba naduh Jowai ter ter shaduh Ratacherra, ki paidbah nongleit nongwan ki la mad jingeh bad kumjuh ruh ki khynnah skul kiba donkam ban beh ïa ka por sha skul bad ka jing ktieh bad jingjyrsheih ka surok ka la buh jingeh haduh katta katta khamtam ïa ki khynnah skul.
Katkum ka kaiphot ba la ioh pdiang da ka seng, la ong ba ka NHAI ka la ong ba na ka daw ka jingther jur palat u slap ha ki aiom slap ka la pynlong ïa ka surok ba kan jot, kan julor , la ong ruh ba ki nongtrei jong ka NHAI ki la dep ban maramot ïa ka surok naduh ki bynta jong ka surok na Sonapur shaduh Ratacherra kata ha shwa ban wan ka por slap, la ong ruh ba na ka daw ka jingther u slap ki nongtrei ki la sangeh noh shwa bad kin sa bteng biang ynda la poi ka por ba rang bad bym don slap.
Shuh shuh, ka NHAI ka la kam ba ïa ka jingmaramot ïa ka surok ki nongtrei ki ju leh man ka por, hynrei tang ha ki katto katne ki jaka ki khlem leh ïa ka jingmaramot bad ong ruh ba ka jingsniew bad jingjulor ka surok ka dei na kiba bun ki daw ba kynthup ka jingtuid ka um na ki jaka sait kali, ka jingpyniaid pathar ïa ki pipe um bad namar ka jingkit palat pud ki kali ba kit jingkit kiba kit ïa ki mar na ki par bad ka jingpyntuid um pathar na ki shnong ki thaw ki bym don ïa ki nala tuid um kiba biang.
Ka NHAI ka la kynnoh ruh ba na ka daw ka jingot ne pom pathar ïa ka khyndew, ka jing jingpyndap pathar ïa ka khyndew ha ki par maw jong ki briew shimet kata naduh Khliehriat shaduh Ratacherra ka la wanrah ïa ka jingjulor ka surok.
La ong ruh ba ka NHAI naduh ka 29 tarik u nailur 2023 ka la ioh ïa M/s SL Infra, ka ba la shim ïa ka contract ban pyntrei ïa ka kam ban maramot ïa ka surok kaba naduh Sonapur (kilometer 141+500) shaduh Ratacherra (kilometer 171.455) bad ka M/s M R Construction, ka ban trei naduh Jowai (69.200 KM) haduh Sonapur (141.500KM) bad mynta ka NHAI dang pyrkhat bad ap ruh ïa ka jingmynjur halor ka jingkyrpad (proposal) ban shna bha ïa ka surok kaba naduh Jowai shaduh Ratacherra (102.255 kilometers), la ong ruh ba ka ophis treikam jong ka NHAI lem bad ki contactor jong ka Highway Project ki pyrshang katba lah ban maramot pynbha ïa ka surok bad ruh ban shim khia bha ban maramot ïa ka surok bad kular ruh ban pynlong ïa ka surok NH-6 naduh Jowai shaduh Ratacherra ka surok kaba bha bad kaba shngaiñ ha ka leit ka wan.