Bthah u DC ïa ki skul ha EKH ban pynsangeh ïa ki kam kiba shabar ka kamra klas
Phah ka ophis DC ban khang ïa ki skul ha Dangar
![](https://mawphor.com/wp-content/uploads/2022/05/mawphor-1-2.jpg)
Shillong, ïaïong, 20: U Deputy Commissioner jong ka East Khasi Hills District ha ka jingpynbna paidbah ba la pynmih ha ka sngi Palei u la bthah ïa baroh ki skul kiba don hapoh u pud u sam jong ka East Khasi Hills District ba kin pynsangeh shwa shipor ïa kino kino ki kam kiba shabar na ka kamra klas.
“Namar ka jingshit kyrang jong ka sngi bad ban pynthikna ïa ka jingshngaiñ jong ki khynnah skul ha baroh ki shlem pule kiba don ha ka thaiñ Dangar kaba hap hapoh ka Mawsynram Block kin khang khyrdep naduh ka 21 tarik mynta u bnai na ka bynta shitaiew kynthih, lane, tad haduh ban da pynbna da kumwei pat,” la ong u Deputy Commissioner ha u kyrwoh ba la phah sha ki lad pathai khubor.
“Baroh ki kam kiba ïadei shabar na ki kamra klas jong ki skul kiba don ha East Khasi Hills dei ban pynsangeh shwa tad haduh ban da pynbna da kumwei pat,” ong u kyrwoh na u Deputy Commissioner.
Dang shen, ka Directorate of School Education and Literacy lyngba ka Director ka Kong RM Kurbah ka la bthah ïa ki san ngut ki Deputy Commissioner jong ki District kiba don ha rilum Garo baroh kawei ba kin ïasyllok bad ki District School Education Officer (DSEO) ban phah khang shipor ïa ki skul khnang ban ïada ïa ka jingkoit jingkhiah jong ki khynnah skul namar ka jingshit kyrang shaba palat jong ka sngi.
Shuh shuh ka ophis Deputy Commissioner (DC) East Khasi Hills mynta ka sngi ka la pynmih ïa ka hukum ba baroh ki skul kiba don ha ka thaiñ Dangar kaba hap ha Mawsynram Block, ba kin khang noh shuwa shipor namar ba jur palat ka jingshit kyrang ka bneng.
La bthah ba ki skul ki dei ban khang naduh ka 21 tarik IaIong 2023 na ka bynta shi taïew lane tad haduh ban da ai hukum da kumwei pat.
Kane ka jingphah khang ïa ki skul kiba don haka thaiñ Dangar kadei namar ba jur ka jingshit naka bynta ban ïada ïa ki khynnah skul na kano kano ka jingma kaba lah ban ktah naka jingjur palat ka jingshit.