Khliehriat, Jymmang, 20: Katkum ka shithi ba la wan na u Director Food Civil Dupplies and Consumer Affairs Meghalaya Shillong, ka shithi No.DSCA/TMA/12/AADhaar/VOL-III/418, tarik 2nd May 2025, kum shibynta da ka jingkhmihlynti ban pynioh ïa ka jylla sha ka 100 percent hapoh ka 30 tarik u jylliew 2025 jong ka jingpyniasoh ïa ki Adhaar No., ha ka reshon card jong baroh ki nongbam reshon, ne khaw reshon ba hapoh ka skim National Food Security Act 2013.
Ha kaba ïadei bad kane ka ophis u Deputy Commissioner Supply, Khliehriat ka bthah bad ban jur ïa baroh ki Aadhaar Operating Centre hapoh ka district ba la pynïaid da ka ophis jong u Deputy Commissioner ba kim dei shuh ban ohdor lane shim pisa na ki nong bam khaw reshon (NFSA beneficiaries) kiba wan mih sha ki centre ban leh ïa ki jingdonkam na ka bynta u Aadhaar Card jong ki, kita ki long naduh ka jingpynbeit ïa ki kyrteng, jingpynbeit ïa ki jaka sah(Adress), lane ka tarik sngi kha (Date of Birth) kaba ngi khot ka Demographic bad kumjuh ïa ka Biometric Updates ka jingshon kti lane ka jingshon ïa ki khmat, kane ka long lada ki wan mih sha ki centre da kaba ki pynbiang ïa ki kot ki sla kiba donkam kiba biang.
Kane ka jingpyntip kan treikam noh mardor naduh ba pynmih ïa kane ka jingpynbna tat haduh ban da pynbeit da kumwei pat, ong u kyrwoh na u Deputy Commissioner Supply East Jaiñtia Hills District.
