Bthah u Chief Secretary ïa ki Pulit ban pynneh ïa ka shongsuk ha khappud Megh-Assam

Shillong, Lber, 27: Khnang ban pynneh pynsah ïa ka shongsuk shongsaiñ ha khapud jong ka jylla Meghalaya bad Assam namar ka jingdon jong ka Elekshon Lok Sabha, u Chief Secretary ka Jylla Bah Donald P. Wahlang, ha ka sngi Balang u la lum ka jingïalang bad u Additional Chief Secretary ka tnat Home (Police) Dr. Shakil P. Ahammed, u Director General of Police Dr. Lajja Ram Bishnoi, u Commissioner and Secretary, ka tnat ERTS Sanjay Goyal, u Chief Electoral Officer Dr. B.D.R. Tiwari, bad ïa ki ophisar jong ka tnat Election, u Secretary ka tnat Home (Police), u Inspector General (IG) ka Frontier Headquarters, BSF Meghalaya bad ïa ki State Police Nodal Officer ba kynthup ïa u M.K. Singh.
Ha kane ka jingïalang kaba la long ha Main Secretariat, Shillong, u Chief Secretary u la pan jingtip halor ki jinglong jingman ha khappud shwa ban wan ka elekshon Lok Sabha.
Katkum u kyrwoh ba la phah da u Joint Chief Electoral Officer ka Sorkar Jylla u la pyntip ba u DGP Dr. Lajja Ram Bishnoi u la pynsngew halor ka jingteh lam ïa ka shongsuk shongsain ha ka jylla bad ha ki jaka khappud.
U la ïathuh ruh ba ka don ka jingïatreilang kaba jan bad ki Pulit ka Jylla Assam ban pynneh pynsah ïa ka shongsuk shongsaiñ ha khappud.
La pyntip ruh ba ka Election Commission of India (ECI) ka la buh sngi ban pynlong ïa ka jingïalang Inter-State Border Meeting ha ka 3 tarik,Ïaiong, 2024 bad ka Jylla Assam.
“La ïakren ruh halor ki lad ki lynti kumno ban peitngor ïa ka jinglong jingman ha khappud, ban ïada, ban kem ïa ki nongthaw jingkulmar, ban khang ïa ki khyrdop rung bad mih bad ïa ki jaka khappud ba dang long laitlan, ban pynbna ïa ka sngi tyrkhong kiad bad ka sngi shuti ba hap siew bainong, ka jingpyntreikam ïa ki NBW bad kiwei kiwei,” la pyntip u Joint Chief Electoral Officer ka Sorkar Jylla.