Shillong, Jymmang 04: Watla ka kynhun ïalehkai phutbol jong ka Meghalaya ka la shah pynphai shi kol ha ki minit ba khatduh shuwa ban wai hynrei ka la lah ban ïada skhem ban jop da 2-1 kol ha ka jingïakhun pyrshah ïa ka Kerala na ka Group A ha ka lympung ïalehkai jong ka ‘Swami Vivekananda U-20 Men’s National Football Championship 2025’ ha Narainpur, Chhattisgarh, ha ka sngi Saitjaiñ.
U Banlamkupar Rynjah (27′) bad u Deibormame Tongper (68′) ki la pynkhih ïa kitei ki ar kol ba kongsan na bynta ka Meghalaya, katba u Mohammed Adhnan (90’+1) u la ïoh ban pynphai shi kol na bynta ka liang pyrshah lyngba ka penalty.
Kumban shu pynkynmaw, ka Meghalaya ka la pynliem ïa ka Rajasthan ha ka jingïalehkai kaba nyngkong kaba long ha ka 29 tarik ïaïong bad kane ka jingjop kaba ar ka la pynlong ïa ka kynhun ban kamai 6 poiñ.
U Coach kynhun u Bah Bobby L Nongbet ula pynkylla tang kawei ka jaka ïa ka kynhun ïalehkai ba sdang jong u ha kane ka jingïakhun, da kaba wanrah ïa u Ricky Kharkongor ha ka jaka jong u Pyrkhatshaphrang Sumer.
U Banlamkupar u la khyrwit tyngeh ïa ka bol ban ïaid lait ïa uwei u rangapdien (defender) bad ïa u rangap kol ka Kerala hapoh ka phyllaw kol kaba la pynlong ïa ka Meghalaya ban lamkhmat ha ka kylla step.
Lah ban ong ba ka kol kaba ar ka la wan hadien ba u rangap kol ka Kerala u Devanandan, um shym la lah ban pyllait ïa ka bol ba la pashat shadien na ka jingma. Kane ka la ailad ïa u Deibormame ban pyndei tiak ïa ka bol shapoh kol.
Ka jingbakla hapoh phyllaw kol ha ka por ba la jan kut ka por pynjlan ka la ai jingkyrmen ïa ka Kerala hynrei, watla ki la lah ban pynphai shi kol lyngba u Adhnan, hynrei kim shym la lah ban shem ïa ka kol ban pynïakhaid, ha kaba ki khynnah ïalehkai jong ka Jylla Meghalaya ki la trei shitom ban khanglad ïa ka liang pyrshah ban tehlakam bun shah ïa ka bol.
Kumta ka Meghalaya ka don sa kawei ka jingïalehkai na ka Group, ka ban long pyrshah ïa ka Bihar mynta ka sngi Nyngkong.
