Nongstoiñ, Rymphang 3: Ka jingdon jong ki jaka jngohkai kiba itynnad ha West Khasi Hills ka la khring ïa ki briew na kylleng ki jaka ym tang na ki jylla hapoh ka ri India, hynrei wat ïa ki nongshangkai pyrthei kiba na shabar ka ri ruh. Kumba ka long ha kine ki sngi ki jaka jngohkai hapoh ka District na kylleng ki jaka ki don tang tengkhat lano re namar ka jingsniew palat ka surok.
Ka Mawphanlur Tourist Spot ka dei kawei na ki jaka jngohkai kaba la khring bha ïa ki nong-shangkai suwari na kylleng ki jylla jong ka ri India bad na shabar ri ruh. Hynrei ha kaba ïadei bad ka jingwan jong ki nong shangkai suwari, ka Kong K.Lyng-khoi kawei na ki nongïalam jong ka Seng Longkmie shnong Mawphalur, haba ïakren bad u nongthoh khubor, ka la ïathuh ba ha kine ki sngi kiba kham bun kiba wan shang suwari ha Mawphanlur ki dei kiba nabar jylla hynrei kiba napoh ka jylla pat ki duna bha.
Katei ka longkmie ka la ong ruh ba ka jingduna jong ki nongwan shangkai kiba dei napoh ka jylla, ka lah ban dei namar ka jinghiar ka ïoh ka kot bad ka kamai kajih namar ka bai rung sha katei ka jaka jngohkai ka long shispah tyngka shi khlieh briew, hynrei lada pyrkhat bha pat shispah tyngka shi khlieh kam pat rem satia.
Katei ka longkmie ka la ong ruh ba nangne shakhmat ki nongwan shangkai suwari ha katei ka jaka kin bun bha bad wat kiba dei napoh ka jylla ruh. Kumta ka la kyntu bad kyrpad jur ïa kino kino kiba wan shang kai ha katei ka jaka ba kin kiar na kaba bret pathar ïa ki bilor, ki plastic bad kiwei kiwei ki tiar kiba haba ki la dep pyndonkam.
Ka la ong ruh ba ka ki nongpynïaid jong katei ka jaka jngohkai ryngkat ka dorbar shnong, ha ryngkat ka jingïatrei lang bad ka seng longkmie kam kwah satia ba ki sawdong sawkun jong katei ka shnong kin kylla jakhlia bad ba ka mariang kan jaboh. Namar naduh Mawphanlur haduh Mawthadraishan ki dei ki tyllong um kiba bsa umbam umdih ïa ki phew tylli ki shnong ha katei ka thaiñ bad lada ka mariang kan jaboh ka umbam um dih ba ki shnong ki thaw ki ring na ki tyllong um kiba mih na katei ka thaiñ, kin kylla sniew bad kan ktah shibun ïa ka koit ka khiah jong ki paitbah.
