Shillong, Nailar 23: Ka Seng HITO kum ka dak ka jingpyrshah ïa ka jingkren pynshit bad kren sniew ki kattokatne ki heh jong ka Meghalaya Cements Limited ne ka TOPCEM hynnin ka sngi ïa ki paidbah ba ïakhih pyrshah ïa ka Public Hearing ha Thangskai, ka la khot ïa ki paidbah ban kyntait ne ban nym thied shuh ïa ka dewbilat bad kiwei kiwei de ki jingpynmih na kane ka Kompeni.
Mynta ka sngi ki dkhot jong ka Seng ki la leit tah da ki jingthoh ha kylleng ki jaka jong ka nongbah Shillong bad khamtam eh ha ki dukan die dewbilat ban kyntu ïa ki paidbah ban boycott ïa ka dewbilat TOPCEM. Ka Seng ka la ong ruh ba hadien ba ladep na Shillong kan sa leit kylleng ka ri Khasi ban leit pynbna ïa kane ka jingboycott.
U President jong ka Seng, u Bah Donboklang Dkhar, u la ong ba ka jingkren pynshit bad ka jingkren tohmet ki da ki katto katne ki nongtrei jong ka MCL ban bom ban tied ïa ki paidbah ka long kaba bym lah satia ban pdiang. “
Ngim lah ban pdiang ïa ka jingleh ki heh ka Kompeni MCL pyrshah ia ki briew jong ngi bad ki briew ka MCL kidei ban kynmaw ba kidei tang ki bar jylla bad ki nongkhaïi ba wan hangne, kim dei satia ki trai shnong ba kin trei katba ki mon”, la ong u Bah Donbok, da kaba bynrap ba ka Seng kan sa peit hadien lada kine ki briew kin pan map ïa ka jingleh jong ki.
