Watla ka don ka jingsngewkhohñioh ïa ka hukum jong ka Sorkar Jylla Meghalaya, ban ai shuti ïa ki skul ha ka sngi ba u Bryan Adams, u nongrwai ba pawnam ka pyrthei, u rwai ha ka 10 tarik December 2024 ha Madan JN Sports Complex ha Polo. Pynban ka concert ha katei ka sngi ka la long kaba shongshit bad kaba sngewtynnad ha kaba da ki phew hajar ngut ki riewieid jingrwai ki la sakhi bad ïakynud lang ryngkat u ryndang ba syiang jong u Bryan Adams. Ha ka liang ka jingpynmyntoi ïa ka kamai kajih bad ka ïoh ka kot, nga kubur bad u Bah James Perry, uba dei u nong Canada uba la kha ha Mawlai bad uba mynta u long u nongsengkam uba pawkhmat. Une u rangbah u la kynthoh ha ka rynsan social media kumne, “Ka jingpyrkhat ba ka jingwan jong ki nongrwai ba pawnam ha ka pyrthei sha Shillong, ka kyntiew ïa ki kam jngohkai bad ka ïoh ka kot ka long kaba bakla. Hooid, ka jingwan jong kine ki nongrwai ka long kaba sngewtynnad bad ka wanrah jingmyntoi tang ar ne lai sngi. Ka kam jngoh kai ka dei ban shaniah ha lade hi ym ha kiwei pat. Kito kiba wan sha ki concert ne tamasa, ki pyllut pisa tang ha ki tamasa bad kim leit jngoh ïa ki shnong ki thaw. ïa ki concert ne tamasa dei ban pynlong tangba kam dei ka kamram jong ka tnat Tourism ban pynlong ïa ki concert…”
Ki rynsan paidbah bad ka jingshngaiï ïa ki paidbah: Ka J.N Sports Complex ha Polo, kaba la pynheh mynta ka lah ban pdiang bad pynbiang jaka shong haduh 30 hajar ngut ki nongpeit, pynban kam dei pat ka jaka kaba bit kaba biang ïa kiwei ki para briew kiba duna ha ki dkhot, kam dei ruh ka jaka kaba shngaiñ ïa ki riewtymmen bad ki briew kiba kham tlot ha ka bor met. Katkum ka jingkheiñ kaba rit, ym duna ïa ka 20 ne 25 hajar ngut ki paidbah ki don ha ka concert kaba la long ha ka 10 tarik December 2024.
ñiuma, ki nongpynïaid ïa kane ka concert ki la buh lypa la ki jong ki khyrdop ban rung na ka bynta ki paidbah katkum ki tiket bapher ba ki thied, hynrei kaei kaba nga mad ha katei ka sngi haba nga rung bad mih na madan, ka pynlong ïa nga ban ai kane ka jingkynthoh bad khamtam eh ban buh ïa u dak jingkylli halor ka jingshngaiñ jong ki paidbah haba pynlong ïa kum kine ki rynsan paidbah, la ka long ki tamasa rwai ne ïaleh sport ne ki jingïaseng ne ki jingïalang paidbah. Ha katei ka sngi nga sakhi ba ka jingshngaiñ jong ki paidbah ka don ha ka jingma namarba ki jaka rung bad jaka mih na madan ki long kiba khim bad ka shim por palat. Nalor nangta la shu ïa phngaiñ, ïa tynniañ bad ïa khynñiat para met. Ha katei ka por, kawei kaba la pynsyier ne pynshujer ïa nga shiphang ka long, kaei ka ban jia lada khynñiuh u jumai (hooid u Blei um shah ban jia thala) ne lada don ka jingïashoh kaba jur. Lada ka jia kumta, khlem artatien ka jingmynsaw ne jingjulor kan long kaba jur.
Kum uwei na ki nongshong shnong uba ju smat ban leit sha kane ka madan ïaleh sport ha J.N Complex, Polo, nga sngewthuh bad tip ïa ki jingeh. Mynta kumne ki dang pyntrei ïa ka jingtei bathymmai sawdong jong kane ka madan nalor ka jingpynheh ïa ki jaka shong. Mynhsuwa ka sawdong sawkun jong ka JN Sports Complex ka long kaba heh bad kylluid, hynrei ka jingtei bad ka jingpynheh ïa ka, ka la ktah ïa ka ïaid ka ïeng bad ka la bam jaka haduh katta katta.
Ka don tang kawei ka jaka rung bad jaka mih na ka khyrdop kaba don mar pyrshah bad ka Short Round Road. Katto katne ngut napdeng ki paidbah kiba tip ba ka don sa kawei pat ka khyrdop kaba mih sha ka surok kaba leit sha Saw Phurlong-Demseiñïong bad kaba pynïasoh bad kiwei de ki surok kum ka surok ‘Lawdum-Bomfyle ter ter, kumta ki la mih bad ïaid noh lyngba kane ka khyrdop hadien ba la wai ka concert. Phewse, ki don pat kiba la pynïeng ïa ki kali jong ki hapoh ka SRGT parking lot, Lawmali, Pynthorbah, Bivar Road bad Oakland, ki la hap ban ïaid kyllaiñ sa kumba 2 ne 3 kilometer ban poi sha ka jaka ba ki pynïeng kali. Kane ka khyrdop ka long kaba kongsan bad ka jingkhang ne ka jingbym shah ïa ki paidbah ban rung bad mih na kane ka khyrdop ka la ktah shibun ïa kiba wan sha ka concert. Ha ka jingshisha kane ka khyrdop ka pynsuk ïa ki paidbah namar na kane ka khyrdop ki lah ban rung, ban mih bad ïaid sha ka surok ‘Lawdum-Bomfyle lane ki lah ruh ban hiar bad kiew na ka thaiñ Laitumkhrah. Yn jin lada ki bor pynïaid ki la plie ïa kane ka khyrdop kan jin da la pynaram shisha ïa kiba bun bah ki paidbah kiba lah ban pyndonkam ïa kane ka khyrdop, ki surok bad ki jaka pynïeng kiba ïajan bad ka.
Ki paidbah ki sngewthuh ba ki lah ban don shibun ki daw kiba pynlong ïa ki bor pynïaid ban khang ban rung bad mih paidbah lyngba katei ka khyrdop, kaba kynthup ïa ka jingshngaiñ lane ka lah ban long na ka daw ba ka jingpyntrei ïa ki jingtei ka dang ïaid shakhmat. Ka long pat kaba kongsan ïa ki bor pynïaid ban kren shai lane ban thaw da kiwei pat ki lad kiba kham bha bad kylluid ka rung ka mih. Ha kawei pat ka liang, ki pulit pahara, ki nongap ïa ki khyrdop bad ki bouncer ki la lah ban tehlakam bad pynïaid beit ïa ka rung ka mih bad ki da pynpaw ïa ka jinglong ba don akor. Kumta ngi ai ka jingïaroh ïa ki. Katba ka rukom pynbeit shabar bad hapoh ka madan ba pynlong ïa ka concert ka long kaba i kynrum kynram bad haduh 45 minit ka rynsan ka sah thylli tat haduh ban da wan mih u Bryan Adams uba la sdang ban rwai bad pynbyrngia ha ka por 8:00 baje mynmiet. Kane ka pynpaw ïa ka jingdkoh na ka liang jong ki nongpynïaid.
Ka jingshngaiñ jong ki paidbah ka dei ban long kaba hakhmat tam eh ha kino kino ki jingïalang ne tamasa paidbah. Hooid, ka jingpynheh ïa ka madan J.N Sports Complex kaba ngiam briew haduh lai phew hajar ngut ka la pynmyntoi shibun. Tangba, ki bor pynïaid ki dei ban khmih bniah biang sa shisien ïa kane ka madan ha shuwa ba kin shah ne ai bor ban pynlong ïa ki jingïalang ne ki tamasa ne ki jingïaseng paidbah ne wat ki jingïaleh sport kiba khring da ki phew hajar ngut ki briew. Kane ka JN Sports Complex ha Polo, wat hadien ba la dep ban pynheh ne shna pynbha ïa ka, kam long shuh ka jaka kaba bit ba biang ban pynlong ki jingïalang kiba khring palat ïa ka san hajar ngut ki briew.
Ka juk thymmai jong ki tamasa ne Concert bad ka jinglehkmen leh risa da kaba ïaburom kylliang: Ym lah ban len ba ha ka concert jong u Bryan Adams ha Shillong, la sakhi ïa ka juk kaba thymmai jong ki kam lehkmen-lehrisa. La sakhi ïa ka jingkylla ha kaba ki paidbah ki la sngewthuh bad pynpaw ïa ka jingdonkam ban ïaburom kylliang iwei ïa iwei pat. Hapdeng ki phew hajar ngut ki paid byllien kiba lehkmen-lehrisa, ki don kiba ïadih kiad bad kumjuh ruh ki bym dih kiad. Baroh ar ki la pynpaw ïa ka akor bad ka jingkongsan ban ïa burom kylliang. Kane ka pynskhem ba ka rwai ka siaw ka lah ban wanlam ïa ki paidbah khlem da shah ïalam bakla ha ka dih kiad bad ka buaid bhor.
Watla hapoh ka madan ki don bun tylli ki dukan kiad hynrei ym shym la ïohi ïa ki briew kiba buaid tanglang bad timsih timsang, hynrei baroh ki pynpaw ïa ka jinglong kaba jai jai. Kato ka juk ha kaba ha ki tamasa kum ki concert ki briew ki ïashoh, ki ïadat bad thaw jingkulmar ka la kut. Dang shen ka concert jong u Bryan Adams ka pynpaw shisha ba ka buaid, ka timsih bad ka ïashoh ïadat kim dei ki bynta jong ka jingkmen ne jinglehkmen.
Ym kum ha ki por kiba mynshuwa ha kaba ki tamasa lehkmen ne concert ki shlei da ki jingïashoh ïadat, ka jingïabuaid jawsheh, pynban ka concert jong u Bryan Adams ka dei ka concert kaba kynjai bad kaba ki paidbah ki pynpaw ba ki don ka jingkitkhlieh bad jingtip briew. Kane ka pynpaw ba ka la don ka jingkylla kaba khraw ha ka jingsngewthuh jong ki briew bad ka jingkylla ha ka imlang sahlang.
Ka jingshngaiñ bad ka jinglehkmen ki ïa ïaidlang, ym lah ban pynïakhlad kawei na kawei pat. Ki tamasa lehkmen bad ki concert ki ai ka rynsan kaba biang ban ïapurkhana shaphang ka hok, ka jingsuk bad jingïaimlang para briew bad ki paidbah ki lah ban ïoh ka jingïadei kaba jan para nongshong shnong bad ki ïoh ruh ka lad ban pyntngen, ban pynjahthait ne pynjahjrem ïa ka jingim kaba bunkam bad ha kane ka rukom ha ki concert ne ki tamasa jong ka rwai ka siaw, ki sur tem bad sur jingrwai ki shim ïa ka jaka pdeng. Ha kane ka juk kaba thymmai jong ka lehkmen-lehrisa, kaba kongsan tam ka long ban pynleit jingmut bad sngap ne peit thuh ïa ki sap kiba kyrpang ba ki kaitor ki pynpaw paidbah. khlem da pynlut por ha ki kam ki bym phoida. Shuh shuh, ym lah ruh ban len ba ki riewieid jingrwai jong ka nongbah Shillong ki dei shisha kiba ieid jingrwai haduh u pud ba ki ïarwai lang ryngkat kawei pa kawei ka laiñ jong kawei pa kawei ka jingrwai kaba u Bryan Adams u rwai nalor rynsan bad kumta la lah ban pynlong ïa ka miet kaba sah kynmaw shi rta.
Ki tamasa ne Festival ne Concert ki dei ki “Pain Killer”: Hato ki tamasa ne concert ne festival kiba la pynlong ha kine ki sngi ki ha ka Jylla ki dei tang ki “pain killer” ne ki dawai pynjah jingtyrha kiba tang shipor? Ki riewstad philosophy ne ki philosopher ki ju ong ba wat ka jingngeit Blei ne ka niam ne ki kam pynshong shit niam ruh ki dei tang ki kynja jingdih pynbuaid kiba pynshoh bieit ne pynshoh samthiah kiba tang shipor ne ki kynja jingdih kiba pynklet shipor ïa ki khun bynriew na ki jingeh, ki jingshitom, ki jingkhuslai bad jingdukha mynsiem. Lada don eiei ban kynthoh ïa ki tamasa ne festival ne concert kiba la pynlong ha ka Nongbah Shillong bad Jylla, ka long nyngkong eh ban tohkit bniah haduh katno kine ki tamasa ki la wanrah ne kyntiew ïa ka kamai kajih ne ka ïoh ka kot jong ki nongshong shnong ka Jylla? Kumno ban pynïaid kham bha bad ban shem ki lad ba kine ki tamasa ki dei ban pynïohnong bad pynriewspah ïa baroh ki trai Jylla, ym tang ïa ki khyndiat ngut. Mynta, ba ha ka jingpynïaid ïa kine ki tamasa ne jinglehkmen-lehrisa, ka tnat ne ki tnat jong ka Sorkar Jylla, kum ka Tourism ki ïadon kti, kumta dei ban tih bniah ne wad jingtip ne pan jingkheiñ na kine ki tnat Sorkar, la ka long neem kaba khuid, kaba shai bad kaba lait na ka bam klop lane la ka don neem ka jingleh shilliang khmat ha kaba tang kiba don jingïadei bad ki nongsynshar ki ïohnong ne ïohmyntoi ne ïohdon ka khwan ka khun ranab sha lade shimet?
Kiba kum kine ki tamasa ne concert lehkmen-lehrisa ki la ju long naduh mynshuwa bad ki dei ban ïailong ha ki por ki ban wan. Napdeng jong ngi kiba khie bad san ka jinglong samla ha ka Nongbah Shillong, ha ki snem 1980 ter ter ngin kynmaw ïa ki concert bad ki beat contest kiba pawnam kiba ju long manla ka snem ha State Central Library (mynta U Soso Tham Auditorium). Ha kine ki concert ki kynhun nongtem kiba pawnam jong ka Ri India kum ka kynhun Shiva, 13 Ad, Rock Machine, Hazzard bad kiwei ki ju wan ban pynbyrngia da ki sur bad ki sap kyrpang jong ki.
Ngan pynkut ïa kane ka jingthoh da ki kyntien u Bah R.S. Lyngdoh uba ong kumne; ‘U (Khasi) u don ruh ka jingsngewthuh kaba pura ba ka jingim bunkam khlem ka rongbiria ka pynlyngkot ïa ka rta…”
