Beh shnong ki paidbah ïa ka Kong Morias Rani na ka shnong Belahari

Nongpoh, Naiwieng, 24: Ki paidbah nongshong shnong jong ka shnong Belehari kaba hap hapoh ka Hima Nongkhlaw, Ri Bhoi District ki la shim da ka rai batyngeh ban beh shnong noh ïa ka Kong Morias Rani da kaba kynnoh ba ka dei kaba ju long nongpyrshah bad ka nongpynthud ïa ka shongsuk shongsaiñ ki paidbah hapoh ka shnong ka thaw bad halor ki kam leh donbor ban knieh jubor ïa ki khlaw shnong da kaba shu rejistar tuh sha ka ophis jong u Deputy Commissioner ka Ri Bhoi District.
Ka Dorbar shnong bad ki paidbah nongshong shnong ki la mad ïa kane ka jingeh naduh u snem 2011 ba ka Kong Morias Rani ka la rejistar tuh ïa ka khlaw shnong da kaba kam nongkynti syndon ïa ka khlaw shnong.
La ïathuh ba ki don ruh san ngut ki nongshong shnong kiba la leh ïa kane ka kam da kaba rejistar tuh ïa ka khlaw shnong bad ka khyndew, hynrei hadien ba la ïa pynbeit bad ka Dorbar Shnong ki la kohnguh ban pynduh noh ïa ka Registration jong ka khlaw, hynrei dei tang ka Kong Morias Rani kaba la ïaleh pyrshah ïa ka Dorbar Shnong da kaba ujor sha ki bor ba dei peit jong ka Sorkar khlem da sngap shuh ïa ka jingïapynbeit jong ka shnong.
Ha ka sngi Saitjain ka shnong Belahari ka la lum da ka Dorbar ban ïa kren sani halor kane ka kam da kaba phah ïa ka jingthoh sha ka Kong Morias Rani ba kan don lang na ka bynta ba ïa kren pynbeit ïa ka kam bad ym tang katta nalor ka shithi ba ki la khot ïakren ïa ka, ki la phah khot ruh da ki briew ba la aibor da ka Dorbar Shnong ba kan wan sha ka Dorbar, hynrei kaba pynbitar ïa ka Dorbar Shnong bad ïa ki paidbah nongshong shnong ka long halor ka jingïaleh pyrshah pynban jong ka Kong Rani ka bym shym la leit mih hi tdot sha ka Dorbar.
Haba kren sha ki lad pathai khubor hadien ka Dorbar paidbah, u Rangbah Shnong jong ka shnong Belahari u Bah Peter Stone Syngkli bad u Secretary Shnong u Bah Khrawpyrkhat Rani, ki la ïathuh ba na kane ka Dorbar ki paidbah ba la ïashim bynta naduh ki samla, ki longkmie bad ki rangbah ki la rai ban ym shah shuh ïa ka kong Morias Rani ban shong ban sah hapoh u pud u sam jong ka shnong namar ka jingïaleh pyrshah ïa ka shnong bad ruh kiwei ki kam kiba ka la leh ban pynjynjar ïa ki paidbah da kaba kam jubor ïa ka khlaw shnong ban rejister tuh ïa ka khlaw.
Ki la kynnoh ruh ym tang ba ka la rejistar tuh ïa ka khlaw shnong ban kam trai ne kam nongkynti, hynrei ka ju leh ruh ïa kiwei ki kam kiba pynjynjar shisha ïa ki paidbah da kaba ka ju pynkem ïa ki nongshong shnong kiba rep bad kiba pom dieng katkum ka jingdonkam ha ïing ha sem ba ka khlaw ka dei ka khlaw shnong bad phewse ki mad pynban ïa ka jingjynjar ba kane ka loongkmie ka ju ujor sha ki bor jong ka Sorkar Assam watla ka khlaw ka dei kaba dang hap ha u pud u sam jong ka shnong Belahari hapoh ka jylla Meghalaya.
Ki ki nongïalam shnong, ki la ïathuh ruh ba kaba pynsat bad kaba pynbitar ïa ki paidbah ka dei ka jingleh donbor jong ka Kong Rani ha kaba ki paidbah kim ju don jingsuk ha shnong ha thaw, ha kaba wat ïa ka jingpynbha ïa ka surok ruh ba ki tih ïa ki maw ban pynbha ïa ka surok na ka bynta ka jingbit jingbiang ki paidbah ha ka leit ka wan, hynrei ka Kong Rani ka ujor sha ki bor ka Sorkar Assam kaba la pynjynjar ïa ki paidbah.
Ki la ïathuh ba ym tangba ka la pyrshah ban pynbha ïa ka surok hynrei ka la ujor ruh ban pynkem ïa ki paidbah kiba pom dieng ne rep da kaba ïaleh pyrshah ïa ka shnong tang na ka daw ba ka shnong ka khnang pyrshah halor ka khlaw ba ka la rejistar tuh sha ka ophis u Deputy Commissioner, Ri Bhoi.
Ki paidbah jong ka shnong ki la aipor tang san sngi ba ka Kong Rani ka dei ban mih noh napoh ka shnong bad ki la rai ba ka bor shnong kan ym pdiang shuh ba kan long kum ka nongshong shnong jong ka shnong Belahari halor ki kam ïaleh pyrshah ïa ki paidbah bad ïa ka Dorbar Shnong.