Beh krad ka KSU ïa ki bar Jylla ba trei ïa ka surok Nongstoiñ-Kyrshai
![](https://mawphor.com/wp-content/uploads/2024/07/katto-katne-ki-bar-jylla-ba-shna-surok-Nongstoin-Rambrai-1-Copy.jpg)
Nongstoiñ, Naitung, 16: Ka Khasi Students Union hynne ka sngi ba-ar, ka la beh krad haduh 26 ngut ki nongbylla bar jylla kiba wan bylla ban trei ïa ka surok Nongstoiñ-Rambrai-Kyrshai namar ka jingbym don ïa ka Work Permit.
Ka KSU West Khasi Hills bad Rambrai Circle, ba la ïalam da u Organising Secretary Wanbhakupar L Nonglait, ka pyntip ba kine ki nongbylla bar jylla, ki dei kiba la wanrah da ka kompani Spica, kaba pyntrei ïa ka project shna surok ka NHIDCL na Nongstoiñ-Rambrai-Kyrshai.
Ka KSU ka pyntip ba ha ka jingkhynra la shem ba 26 ngut na ki nongbylla ki la pynkheiñ ïa ka Inter-State Migrant Workmen Act, 1979 (Work Permit), kaba la pyntreikam ha Jylla naduh u snem 2011. La pyntip ba 6 ngut na kine ki nongbylla kim shym la lah ruh ban pyni wat tang ïa ki kot ki sla ki ban pynshisha ba ki dei ki nong India.
Ka KSU ka la maham jur ïa ki contractor ba ki dei ban pynbiang ïa ki work permit jong ki nongtrei bar jylla ba ki wanrah ban pyntrei ha ka thaiñ, lym kumta ka seng kan shim da ki lynti kiba tyngeh.
Ka la pyntip ruh ba ka seng kan dang ïai bteng ban pynlong ïa ki jingkhynra ha kylleng ki jaka jong ka District, ban pynthikna ïa ka jingtreikam pura jong ka aiñ Inter-State Migrant Workmen Act, 1979.
Lah ban kdew hangne, ka KSU ka la pynieng ruh haduh 3 tylli ki khyrdop Inner Line Pemit (ILP) ha kylleng ki jaka rung jaka mih ka Jylla ban pyrkhing ïa ka rung ka mih ki bar jylla.
Kine ki khyrdop ki kynthup ïa kawei ka Athiabari, West Khasi Hills, kawei ka Pahammawleiñ, Ri-Bhoi bad kawei ka thaiñ Umstaiñ, East Jaiñtia Hills District. Ka KSU ka la shim ïa kane ka sien jam ban pynbor ïa ka Sorkar ba kan pyntreikam noh ïa ka Inner Line Permit (ILP) bad ka Meghalaya Residents Safety & Security Act hapoh ka Jylla.