Nongpoh, Naitung, 16: Ka seng Hynñiewtrep Integrated Territorial (HITO), Ri Bhoi District mynta ka sngi ka la leit ban beh krad ïa ki nongwan shongkai ha ka jingkieng Flyover ha Umïam, kaba dei hadien wat ka bor shnong bad ka seng ruh ka la dep ban maham ban nym ïa shongkai ne bret jaboh ha katei ka jaka.
Ïa kane ka jingleit beh ïa ki Kali paidbah kiba wan ban leh jaboh ha katei ka jaka la ïalam da u Bah Apbor Nongrum kum u Working President ka seng ryngkat ki dkhot, ki la leit beh ïa ki nongwan shongkai kiba wan ban pynlong ïa katei ka jaka kum ka jaka dih kyiad ba ki jaka leh kam beaiñ ba kum ka bor shnong kam pdiang satia.
U la ïathuh ruh dang shen ka seng ryngkat ka bor shnong ki la dep buh ruh wat ka jingmana ha katei ka jaka ba ym bit ban pynlong jaka dih kyiad ne ka jaka ban lehkam kai, hynrei kumba lap da ka seng ki dang don kiba ïaleh pyrshah khlem da pyrkhat ïa ka bha ka miat bad ka shongsuk shongsain ki paidbah.
U la ïathuh ruh haba leit ban beh ïa kito kiba wan shongkai ha katei ka jaka la don ryngkat ruh ki bor pulit na Umïam, ha kaba la beh lut ïa baroh ki nongwan shongkai kiba pyrshang ban pynlong ïa katei ka jaka kum ka jaka dih kyiad ba ka jaka bret jaboh kaba ktah ïa ka maring bad ruh ïa ka shongsuk shongsain ki paidbah.
Namarkata, na ka liang ka seng ka dang maham nangne shakhmat ba ki paidbah kim dei ban leh khlemakor ha katei ka jaka bad lada ka seng bad ka bor shnong ka dang lap kum ka seng kan shim da ki lad ab tyngeh bad kam banse ban aiti ruh sha ki bor ka aiñ ban leh katkum ki kyndon jong ka aiñ, u la bynrap.
