Nongstoiñ, Naitung 16: Ka jingbteng pynlip lait man la ka sngi bad man la ka miet haduh kine ki sngi, ka la pynlong ïa ki paitbah jong man la ki shnong ha West Khasi Hills ba kin thnum, namar ka jingpynlip bording ka long ar kynta mynstep kata naduh ka por hynñiew baje bad la pynmeh biang ha ka por khyndai baje haduh khatar baje. Nangta la pynlip biang bad pynmeh ha ka por shi baje noh phai sngi bad sdang biang sa ha ka por khyndai baje haduh shiphew baje mynmiet bad pynlip biang ha ka por 12 baje shiteng synia bad pynmeh biang ha ka por lai baje mynstep haduh hynñiew baje.
Katei ka jingbteng jong ka jingpynlip bording la jan man la ka kynta ka ktah haduh katta katta ïa ki nongpyndonkam bording naduh kiba buh dukan type kot, maramot ïa ki tiar electrict, ki karkhana welding, ki karkhana shna kali bad bun kiwei kiwei ki kam kiba pyndonkam da ka boirding electric.
U Bah S.Marngar u la ong ruh ba kaba kham ktah eh ka dei ka jingpynlip bording ha ka por khyndai baje mynmiet, namar ka dang dei ka por ba ki briew ki dang ïabun kam bha haïing hasem. Kaba ktah eh ka dei ïa ki khynnah skul namar ka dang dei ka por ba ki dang khreh kot bad haba la lip ka bording, ki khynnah ki la hap ban shu shong kai shuwa bad haduh ban da poi shiphew baje bun kiba la sam thiah bad haba pynkhreh kot ruh kim sngew tynnad shuh .
Ha kaba ïadei bad ka jingbteng ban pynlip bording u Bah D.Sun u la pynpaw ruh ïa ka jinglyngngoh namar naduh ba u slap u la wan, ka pung Umïam ka la nang dap bad ki khubor ki la saphriang ruh lyngba ki social media naduh ki taiew ba la dep, ha kaba ki la pynbna ba ka MeECL kan ym pynlip bording shuh namar ka pung Umïam ka la dap. Hynrei haduh mynta la ar taïew kynthih ka bording kam pat neh satia hynrei ka lip shi lip man ka kynta.
U la kynthoh ruh ba ka jingthok jong kane ka sorkar ka la nang paw man la ka sngi ha man la ki jait kam khamtam ha kaba ïadei bad ka jingpynlip bording. Ka sorkar ka ong ba hap ban pynlip bording namar ba dang pyllait ïa ka um. Lada rang tyrkhong ruh ka ong ba hap ban pynlip bording namar ba la duna um palat, kumta ym lah shuh ban shan niah ïa ka MeECL bad ka sorkar.
Kumjuh ruh u la ong ruh ba kaba kham pynsngewsih ïa ki paitbah pat ka long ba wat la ka bording ka lip man ka kynta, hynrei ka bai thang bording pat ka kiew man la u bnai bad lada ym leit siew tang shi bnai ruh, ka MeECL ka ong ba dei ban leit ot noh. Ka MeECL ka la dei ban kham pyrkhat lem na ka bynta ka jingmyntoi jong ki paitbah.
