Shillong, Risaw 10: Ka kynhun lehkai kriket ki thei ba mihkhmat ïa ka Meghalaya ki la shah pynliem ha ka Pondicherry da 131 ron ha ka jingïakhun jong ka lympung BCCI Women’s U-19 One Day Trophy kaba la long ha Surat hynne ka sngi.
Hadien ba shah rem da 10 wicket ha ka sngi sdang, ka Meghalaya ka la wanphai ryngkat ka mynsiem ïakhun ha katei ka sngi pyrshah ïa ka Pondicherry, bad ka la lah ban pynhap baroh ki wicket hadien ba Pondicherry ka la kynjoh sha ka 228 ron na ki 43.4 over.
Hynrei phewse ka Meghalaya ka la shah pynhap baroh tang hadien ba kynjoh sha ka 97 ron naki 33.5 over haba beh ïa ka ron ba la buh.
Napdeng ki player ba kham seisoh jong ka Meghalaya dei ka Kambesa A Sangma kaba la khur 3/32 ha ka bowling shuwa ban kamai 18 ron ha ka tied wat hadien ba mih No. 9.
Baroh 9 ngut ki thei kawangbol ka Meghalaya ki la ïoh bynta ha kane ka jingïakhun, napdeng jong ki, ka Fennysha Nongrum ka la ïoh khur 2/31, ka Abiezer Kharsyiem ka la khur 2/36 (kynthup ïa ka thei ba kamai spah ron na ka Pondicherry, ka E Kavisha), ka Jayshree Singh ka la khur 1/6 na ki 4 over ba ki la ïoh,katba ka Ankita Sharma ka la khur 1/49.
Ha ka tied, ka Jayshree ka la ïoh ban kamai 17 ron bad ka Ankita 18 ron bad ki la lah ban kyntiew 43 ron shuwa ban shah pynhap lai wicket. Ryngkatlang, ki la lah ban kyntiew ïa ka ron na bynta ka kynhun watla ki la ïalehkai jaijai, bad la sngewthuh ïa kane tad hadien ba duh ar wicket na ki 5 over kiba shakhmat. Hynrei watla kata ruh, bad ka kynhun lehkai jong ka Meghalaya ka la shah pynhap noh tang hapoh 100 ron.
Hadien shi sngi, ka Meghalaya kan sa wanphai biang ha madan ïakhun pyrshah ïa ka Manipur la Sngi Palei. Ka Manipur ruh ka la shah rem ha baroh ar sien ki jingïakhun ba sdang ha kane ka lympung.
