Shillong, Kyllalyngkot 13 : Ka Meghalaya ka la ïoh ban bat ïa ka kyrdan ba nyngkong na ka Plate Group jong ka lympung ïalehkai Ranji Trophy watla ka la shah rem da phra wicket ha ka Manipur ha ka jingïalehkai kaba la ïaid lai sngi ha ka sngi Palei ha madan ïalehkai kriket jong ka MCA ha Polo..
Ka Meghalaya ka la ïoh rung lypa sha ka knockout shwa ba kan shah rem ha ka Manipur kaba la lah ban ïalehkai bha ha baroh ki liang kawang bad tied bol.
Da kaba mih madan bad donkam tang 17 ron ban jop ïa ka thong ba 29 ron, ka Manipur ka la sdang ban ïalehkai ha katei ka sngi da kaba kamai 12/1, bad duh shuh shuh ki wicket hynrei ka la lah ban pyndep ïa katei ka thong tang ha ki hynriew over, ha kaba u B Rahman u la khyrwit ïa ka saw ron bad ïalam ïa ka kynhun sha ka jingïoh khur jingjop.
Ka shi wicket ba la ïoh ban pynhap ha katei ka sngi kadei ha ki kti jong u Sanvert Kurkalang (1/11), ha kaba ka bol ba la tied da u Ronald Longjam ka la poi sha ki kti u Dippu Sangma. Kadei ka jingïalehkai first class na bynta u Kurkalang ban ïoh khur wicket ha ka Ranji Trophy.
Ha kane ka jingïalehkai u la khur 8 wicket ai kamai 45 ron (ba kynthup 6 wicket ai kamai 18 ron ha ka inning kaba nyngkong), katba u Kishan Singha jong ka Manipur u la ïoh khur ïa ka khusnam Player of the Match.
Na ka liang u Honorary Secretary jong ka Meghalaya Cricket Association (MCA) u Bah Gideon Kharkongor u la ai khublei ïa baroh ar tylli ki team kiba la ïoh rung sha ka knockout stage jong ka plate group bad kyntu kynpham ba kin dang ïai trei shitom ha ka jingïalehkai.
Ka Meghalaya ka la ïoh an rung da kaba pyndep ha ka kyrdan kaba hakhlieh tam, da kaba jop saw sien ïa ki team kiba khlaiñ. Watla ka Manipur ka la jop pyrshah ïa ka Meghalaya, hynrei ka don ha ka kyrdan kaba lai, katba ka Sikkim ha ka kyrdan kaba ar hadien ba ka la jop da kaba pynliem ïa ka Arunachal Pradesh. Ka Bihar kadei ka team kaba knieh ban rung sha ka knockout bad kan sa ïakhun pyrshah ïa ka Mizoram kaba dei kawei na ki team kaba khlaiñ jong kane ka lympung.
Kane kadei ka sien kaba saw ba ïa ka jingïalehkai ba pynïaid da ka BCCI la pynlong ha Nongbah Shillong, kyntup shisien ka U-19 Cooch Behar Trophy bad lai sien jong ka Ranji Trophy. Ka MCA ha katei ka sngi ka la pynkup burom ïa ki nongpeit jong ka madan ba la lamkhmat da u Bah Peter Jarman Lamare, kiba la pynbit pynbiang ïa ka madan kynthup naduh ka jaka ïalehkai bad shabar jong ka ruh.
Ka MCA ka la pynkup burom ruh ïa kiwei kiwei ki dkhot jong ka kiba la ïadon bynta lang ha kaban pynbit pynbiang ïa katei ka lympung ïalehkai kaba jop.
