Nongstoiñ, Nailur, 07: Ka KSU Nongstoiñ Circle mynta ka sngi ka la bat ïa 21 ngut ki mynder kiba thmu ban wan trei ha ka Dhar Company, kaba shna ïa ka surok Nongstoiñ sha Maweit. Ka Seng ka la pan ïa ki kot ki sla ha kaba ïadei bad katei ka jingwan trei jong ki sha kane ka jaka, hynrei la lap ba kim don ei ei. Kumta ka Seng ka la pynphai biang ïa ki sha ka jaka ba ki wan namar ka jingpynkheiñ jong ki ïa ka Interstate Migrants Workmen (Regulation of Employment and Condition of Service) act. 2011.
“Ka KSU man ka por ka ju kyntu ïa ki paradoh ki parasnam, ba ha shwa ban wan ïalam ïa ki bar jylla sha ka jaka ba pyntrei, ki dei ban da pynbiang shwa ïa ki kot ki sla bad don ruh ka jingbah khlieh na ka bynta jong ki, ba ym dei ban ailad ban shu kamai beaiñ bad trei beaiñ. Lada jia eiei mano ban bah khlieh. Ka KSU kan dang ïai khynra shuh shuh ïa ki mynder ba wan trei beaiñ nangne shakhmat”, ong u Pynkhraw Mawnai nongïalam jong ka KSU Nongstoiñ Circle.
