Ban tip bniah ïa ka kam jngohkai pyrthei, da ka jinghikai pynlong ka NSO ha Shillong

Shillong, Jylliew 28 : Ka National Statistics Office (NSO), kaba hap hapoh ka Tnad Statistics and Programme Implementation (MoSPI), Sorkar India, ka la pynlong ïa ka Regional Training Camp (RTC) kaba lai sngi naduh ka 18 haduh ka 20 tarik Jylliew 2025 ha nongbah Shillong halor ki jingjurip ki ban sa long ha ka ri baroh kawei, kata ka dei ka Domestic Tourism Expenditure Survey (DTES), ka National Household Travel Survey (NHTS), bad ka jingwad bniah halor ki kam shna ïa ki jingtei.
Ha kane ka jaka ai jinghikai la sakhi ïa ka jingïashim bynta ki ophisar bad ki nongtrei na ki regional ophis jong ka NSO ha Shillong bad ha Tura, nalor ki nongmihkhmat na ka Tnad Economics and Statistics, Shillong.
Ka Domestic Tourism Expenditure Survey (DTES), ka ban long naduh u bnai Naitung 2025 haduh u bnai Jylliew 2026 kum shi bynta jong ka Wat kaba 80 jong ka National Sample Survey (NSS), kan lum ïa ki jingtip ba bniah halor ka jingpynlut jong ki longïing kiba ïadei bad ka kam jngohkai pyrthei hapoh ka ri. Kan lum ruh ïa ki jingtip halor ka jingbun ki nongwan jngohkai, ki jinglong jong ki iing, bad ki jinglong jong ka jingleit jingwan, ïa kaba yn pyndonkam ban pynwandur ïa ka Tourism Satellite Account (TSA) jong ka India.
Ka National Household Travel Survey (NHTS), ka ban iaid ha kajuh ka por, kadei kaba la saindur khnang ban lum ïa ki jingtip kiba kongsan shaphang ka jinglong jingman ha ka jingleit jingwan, kynthup ïa ka jingthmu, ka por, bad jaka ba ki briew shimet ki leit jingleit. Kane ka jingtip kan ai ki jingtip kiba kordor na ka bynta ka jingkyntiew ïa ki jingdon jingem, ka jingthmu ha kaba ïadei bad ka leit ka wan, bad ki rai ba ïadei ki polisi, khamtam eh ha kaba kyrshan ïa ka Tnad rel bad kiwei kiwei ki tnad kiba ïadei bad ka leit ka wan.
Nalor kine, ka NSO kan pynlong ruh ïa ka jingpeit bniah halor ki kam shna ïa ki jingtei naduh u Naitung haduh Nohprah 2025. Ka jingwad bniah kan pynleit jingmut ha ki kam shna ïa ki jingtei ba la shim da ki jaka treikam ba khlem pynïasoh, khlem da kynthup ïa ki jingthmu seng kam seng jam la jong, bad ka jingtei lajong da ki longïing. Ka jinglap kan ïarap ïa ka National Accounts Division ban khein ïa ka Gross Value Output (GVO) bad ka Gross Value Added (GVA) jong ka kam shna jingshna kaba kham thikna.
Ki jingtip ba la lum na kine ki jingjurip kin long kum ki jingai jingmut kiba kongsan na ka bynta ban thaw ïa ki polisi kiba pynshong nongrim ha ki sakhi, ka jingthmu ha ka ïoh ka kot, bad ka jingpyntreikam ïa ki prokram ha baroh ki kyrdan jong ka ri bad ka jylla. Kumta, ka jingjop jong kine ki jingpyrshang ka shong shibun ha ka jinglong thikna bad jinglong pura jong ki jingtip ba la ai da ki nongai jingtip. Ka NSO ka kyrpad ïa ki paidbah ban ai ka jingïatreilang kaba pura ïa ki nongtrei jong ka NSS ha ka por ba ki leh ïa ka jingjurip bad ban ai ïa ki jubab kiba shisha bad kiba pura. Ka jingpynsngewthuh bad jingïashim bynta jong ki paidbah ka long kaba kongsan ban pynthikna ïa ka jingshaniah bad jingktah jong ki jingtip ba la lum. (PIB)