Ban shngaiñ ka ri, ym leilei lada pyrkhing ïa ki mar na Bangladesh lyngba ka Dawki: Bah Lahkmen

Shillong, Jymmang 24 : U MLA ka Amlarem constituency u Bah Lahkmen Rymbui, ka thain ba don ka Dawki Land Custom Station, ula ong ba ka jingmana ka sorkar India ban khaïi na Bangladesh, ka ktah ïa ka khaïi ka pateng hynrei kum ki paidbah kim sngew ei ei namar ka dei na ka bynta ka jingshngain ka ri.
Haba kylli ïa ka jingshah ktah kiba pynïaid kam khaïi na Dawki Land Custom Station, u Bah Lahkmen u la ong ba ka don beit ka jingktah ïa ki nongkhaïi namar ba ka Dawki LCS kam dei tang ïa ki briew ka Meghalaya hynrei baroh ka thain North East ki wan ban pynïaid mar na katei ka jaka.
Lah ban kdew ba ka sorkar India ka la pynmih hukum ban ym shah shuh ban ïa khaïi pateng ïa ki katto katne ki mar ban wanrah na Bangladesh, bad kine ki kynthup ïa ki jain, ki jingbam, jingdih pynngad, ki shuki ki miej, u kynphad, ki ki tiar plastik bad kiwei kiwei.
Ka Directorate General of Foreign Trade (DGFT), Tnad Commerce and Industry jong ka sorkar India ka la pynmih ïa ka jingpynbna ban ym shah shuh ban wanrah ïa ki mar na Bangladesh na baroh ki kad khaïi ka India lyngba ki Land Customs Station (LCSs), Integrated Check Posts (ICPs) ha Assam, Meghalaya, Tripura bad Mizoram; bad LCS Changrabandha bad Fulbari, ha West Bengal.