Ban rakhe sngikha ba 150 snem, yn plie ïa ka Sardar@150 ka jingïaid paidbah ban long kawei

Shillong, Risaw 14: U Myntri ka sorkar jylla uba khmih ïa ka tnat Sports and Youth Affairs u Bah Wailadmiki Shylla ha ka sngi baar u la pynbna ïa ka jingplie ïa ka Sardar@150 ka jingïaid ban long kawei (Unity March) ha Meghalaya, kaba dei ka jingïalap ha ka ri kaba dei ruh ka jingrakhe ïa ka sngikha ba 150 snem u Sardar Vallabhbhai Patel.
“Kane ka jingïalap ka thmu ban kyrsiew ïa ka mynsiem ka jingïalong kawei bad ka jingaiti ïalade ha kylleng jong ka ri, khamtam hapdeng ki samla. Baroh ngi tip ba ïa u Sardar Patel la ju khot da u Iron Man of India, uba la pynpaw ka jingngeit skhem ba ka India kadei kawei, ka India kaba long kawei, kaba ïatylli, bad ka India kan ïaineh kaba tylli ha manla ka por, kaba ïaibteng ban ai mynsiem ïa ki pateng. Kane ka jingngeit ka dei kaba la pynïaid shakhmat da u Myntri Rangbahduh ka ri u Narendra Modi Ji lyngba ka vision Viksit Bharat@2047,” ïathuh u Bah Shylla sha ki lad pathai khubor.
U la pyntip ba ka bynta jong ka digital jong kane ka kam ïalap la plie ha ka 6 tarik mynta u bnai kaba long shi bynta jong ka Sardar@150 Digital Abhiyan, ha kaba ki samla na kylleng ka ri India ki la ïashim bynta ha ka thoh essay, reel-making, bad ki ïakob kyntip (quiz competitions) hapoh ka Sardar@150 National Essay Competition, Sardar@150 Young Leaders Program, National Reel Competitions kaba la don ha ka MY Bharat Portal. Lyngba ka prokram ba hikai ïa ki samla ban long ki nongïalam kaba dei ruh lyngba ka Sardar@150, ki la don haduh 150 ngut ki samla kiba la shah jied ban ïaid ha baroh ka por ba la buh kaba dei ha ka national padyatra.
Halor kane u Bah Shylla u la pynbna ruh ba naduh ka 31 tarik u Risaw haduh ka 25 tarik u Naiwieng, ki samla kin ïalam ïa ki padyatra ha manla ki district jong ka ri.
Kin sa don ruh ki kam ki ban leh shwa katei ka prokram ki ban sa buh da ki sngi bad ki por ki ban pynlong ïa ka sawdong sawkun kaba bha bad kaba ai mynsiem ha shwa ban sdang ïa ki padyatra.
Kine ki kam kin kynthup ïa ki Yoga bad health camp, ki jingïakren bad ki jingai jinghikai ki ban sa pynlong ha ki skul bad college halor ka jingim bad ki jingkordor jong u Sardar Patel.
Kin don ruh ki jingpynsngewthuh ha ka imlang sahlang, ki jingshim jingkular kiba heh, ba kynthup ïa ka Nasha Mukt Abhiyan, Garv Se Swadeshi Sankalp, ki ban pynlong ruh ha ki jaka paidbah.
Ban kyntiew ïa ka khubor jong ka Atmanirbhar Bharat, yn pynlong ïa ki Swadeshi mela ha baroh ki district ban kyrshan ïa ki riew donsap kiba napoh ka ri bad kumjuh ruh ïa kiba sengkam lajong.
Kin don ruh ki jingpynkhuid kiba hapoh ka Swachh Bharat Abhiyan, ha ki jaka paidbah, ki jaka ba khring jngohkai bad ki um ki wah.
Ïa ki jaka pule, ki seng trei monsngewbha, ki seng ki riewshemphang bad ki samla kin ïoh ki lad ban pynphriang ïa ki khubor ïalong kawei bad ka mynsiem aiti jong u Sardar Patel.
Katba ki District-level padyatra ki long hapdeng ka 31 tarik mynta u bnai bad 25 tarik u Naiwieng, ha kaba ka jingïaid kan long 8-10 km shi sngi, kin don ruh ki jingpyni ïa ka kolshor, ki jingpyninam halor ka Viksit Bharat, nangta ki jingtip shaphang u Sardar Patel, bad kiwei kiwei.
“Kin don da ki hajar ngut ki samla, ha ryngkat 150 ngut ki Sardar Young Leader, kin ïashim bynta ha ka jingrakhe ha ka sngi kaba 11 ka mynsiem u Sardar, ka ban pynkut hapoh ka Statue of Unity. Kane ka jingïaid paidbah kam dei tang ka jingïaid, hynrei kadei ka kam ban tbeh biang ïa ka jingïohi jngai u Sardar Patel haba ïadei ka jingïalong kawei bad ka jingshaniah halade, kaba pynsawa ïa ka jingkhot u Myntri Rangbahduh ka ri u Modi na ka bynta ka Viksit bad Atmanirbhar Bharat,” ïathuh u Myntri ka sorkar jylla.