Jowai, Lber 18: Ka Bouncers Association of Meghalaya (BAM) West Jaiñtia Hills, ha kane ka sngi Saitjaiñ ka la ïoh ban pynkhalai ïa ki Ticket Lucky Draw jong u snem 2024, kum ka lad ban pynmih pisa ïa ka seng kaba la treikam mynta ha ka jingïaid lynti la 3 snem tam ban ai jingshakri ban pynïoh kam ïa ki khun samla shynrang bad kynthei.
Hashwa ban pynkhalai ïa ki ticket la don ka jingïalang ba lyngkot ha ka jaka ai training ka Association ba la pynïaid da u President samla Yoosar Kynjing, ha ka jingdonlang u kongsan jong kane ka sngi u ma D. Kma, u Dolloi ka Eleka Jowai ma Puramon Kynjing, ki dkhot ka BAM bad ki samla ba shah hikai.
Na ka liang u kongsan haba ai jingkren ula ai ka jingïaroh ïa ka Bouncers Association of Meghalaya (BAM) West Jaiñtia Hills, kaba dei kawei na ki kynhun kaba shim ïa ka jingkitkhlieh na ka bynta ban wanrah ïa ka jingshong suk shong saiñ hapoh ka imlang ka sahlang.
Ula ai ka jingïaroh ïa ki kam ba bha jong kane ka seng kiba la leh ha kine ki snem ba la dep, ula ai mynsiem shuh shuh ba kan dang ïaid shakhmat ha ka jingtreikam da ka jingïalong kawei, ka jingïasngewthuh jingmut bad ban ïarap kyrpang ïa ki khun samla ba kin ïoh kam ïoh jam ha kum kane ka juk mynta.
La ong ruh ba ka jingdon kum kane ka Association hapoh ka Ri-Lum Jaiñtia kan ïarap shibun eh lada don kino kino ki Tamasa, ki Fete, ki khawai dawai nalor kiwei de prokram ha kaba ka Association kan ïoh ban shim ïa ka bynta ban long kum ki nongïada bad ki nong pahara.
La pynkhalai ïa ki Ticket Lucky Draw bad ki nongjop ki long kumne 1st Prize: 15018 kaba long 20 hajar tyngka, 2nd: Prize: 4319 ka pisa 10 hajar tyngka, 3rd Prize: 4305 bad ka pisa ka long 5 hajar tyngkat. La kyrpad ïa ki nongjop ba kin wan shim ïa ki khusnam hapoh ka 30 sngi naduh mynta ka sngi ba la pynbna.
