Mawkyrwat, ‘Naiwieng 21: Ka Khasi Hills Autonomous District Council mynta ka sngi ka 21 tarik u ‘Naiwieng, 2023 ka la ïoh ban pynlong ïa ka jingpynsngew paidbah kaba nyngkong hapoh jong ka South West Khasi Hills District lyngba ka Delimitation Committee ka ban pynkhreh ïa ka ‘Delimitation Bill’ na ka bynta ki 29 tylli ki Constituency kiba hap hapoh jong ka Khasi Hills Autonomous District Council jong ka jylla Meghalaya.
Ha kane ka jingpynsngew paidbah jong ka KHADC lyngba ka Delimitation Committee la don ki Myntri Shnong, ki Rangbah na kylleng ki jaka kiba hap hapoh jong ka Mawkyrwat bad Ranikor konstitwensi kiba la wan ban pynsngew ïa la ki jong ki jingsngew ki jong hapoh jong ka ophis jong ka KHADC Mawkyrwat Branch kaba don ha Pyndenpar (Jakrem), South West Khasi Hills District.
Hadien ka jingwan sngap halor ka jingpynkhreh ïa ka ‘Delimitation Bill’ lyngba ka Delimitation Committee la ïoh ka jingkylli jingtip ruh na ki katto katne ngut ha kaba uwei na ki Myntri Shnong, u bah Kitborlang Nongrem, Myntri shnong jong ka Shnong Rangthong u la ong ba kane ka jingpynbeit ïa ki shnong na kawei ka Constituency sha kawei pat kan jin da la bha ban leh hadien ba la Amendment ïa ka 6th Schedule. “Ka jingthmu jong ka KHADC ban wad bniah ïa ki jingeh jong ki paidbah hapoh ki ar tylli ki konstitwensi kiba don hapoh jong ka South West Khasi Hills District ym pat sngewdonkam ban ïa kren ei ei”, ong u bah Kit namar ba haba phai ha ki kam pynroi lada dei ha kano kano ka konstitwensi ki dang ïa long hi kumjuh.
Ha ka jingkren jong u, u bah Kitborlang u la ong ba haba phai pat ban wanrah ne pynsngew ïa ki jingeh jong ki shnong ban pynhap noh na kawei ka konstitwensi sha kawei pat ka dang shem jingeh shibun namar kumba ka long mynta ba South West Khasi Hills District ka dang don tang ar tylli ki konstitwensi kaba heh bad kaba ïar hynrei kumba ïa tip paidbah ba ka lynti ïaid jong ka Amendment ïa ka 6th Schedule ka la poi hapoh ka Central Government ha kaba na ka liang jong ki paidbah ki la don ka jingkhmih lynti ïa kane ka kam.
U la ong shuh shuh ba lada la ïoh ïa ka jingpynïar ne extension hapoh jong ka District Council kane ka South West Khasi Hills District ka la i dei shisha ba kan don noh sa kawei pat ka bhah MDC ha kaba ha ka jingsngew ma u marwei u sngew kumta bad ha kata ka por ynsa ïa peit ba ïa kiba kum kino kita ki shnong yn pynhap ha kata ka konstitwensi ba thymmai.
