Ban pynkhreh ïa ki ar tylli ki jingïaseng heh ha Jakrem, hiar jurip u MLA ka Mawkyrwat

Mawkyrwat, Nailar 02: Kum shi bynta ban pynkhreh ïa ki ar tylli ki jingïaseng paidbah kiba heh ban sa long ha shnong Jakrem, u MLA ka Mawkyrwat Constituency, u Bah Renikton Lyngdoh Tongkhar, u la hiar jurip ïa ki jaka bapher bapher ha ka shnong ban peit bniah ïa ki jingdonkam kiba dei ban pynbha bad pynbiang shuwa ban pynlong ïa kine ki jingïaseng paidbah.
Ha kane ka jingjurip la ïakren ruh halor ki jingdonkam ban pynbha ïa ki surok, ki lynti ïaid paidbah bad kiwei ki jingtei khnang ba kan long kaba la pynkhreh ban pdiang ïa ki hajar ngut ki nongwan jingïaseng ha ki ar tylli ki jingiaseng bah kata ha u snem 2028 ka Balang U Blei Church of God (M&A), Jakrem kan pdiang ïa ka General Assembly, bad ha u snem 2029 ka Balang Catholic Church Jakrem A kan rakhe ïa ka Jubilee ba dap 100 snem jong ka Balang.
Namarkata, kane ka jingjurip jong u MLA ka Mawkyrwat Constituency, ki ophisar lem bad ki nongïalam shnong ka long ban pynsted ïa ki kam pynroi bad ban pynthikna ba ki jingdonkam kin long ki ban sa pynbiang shwa ka por.
Shwa ka jingleit jurip ïa ki jaka, ka Shnong Jakrem lyngba u bah Pascal Wahlang uba dei u Myntri Shnong ka la buh ruh ka jingkyrpad lyngba ka dorkhas ha kaba haduh 20 tylli ki list ban shna ïa ki surok ha kaba ïa dei bad ka Jingiaseng General Assembly COG (M&A), Jakrem bad ka Centenary Jubilee jong ka Balang Catholic Church Jakrem A kata: ban pynbha ïa ka jingshna surok (WBC) hapoh shnong Jakrem, kaba jrong kumba 3.5 Km, ïa ka surok Jakrem-Tynrong Rangmaw, ryngkat bad ka jingshna ïa ki Protection Wall ha baroh arliang jong ka surok naduh 0 Km, ïa ka surok hapoh shnong, kaba kynthup ruh ïa ka MBT ha Iewmawlein (MG Road), ban shna ïa ka Retaining Wall ha Knerlyngdoh, ha ka surok kaba la don lypa, ban shna bad pynbit pynbiang ïa ka surok, kaba kynthup ïa ka MBT ha Sngimietnah (MG Road).
Nangta, ban shna bad pynbha ïa ka surok na Pyndenkseh sha Nongshyllang (MG Road), ban shna bad pynbha ïa ka surok na Pyndenjadap sha Pungwat (MG Road), ban shna bad pynbha ïa ka surok na Presbyterian U.P. School shaduh Siejphu (MG Road), ban shna bad pynbha ïa ka surok na Umpliang sha ka jaka ïingmane Balang U Blei, Sngimietnah (MG Road), ban shna bad pynbha ïa ka surok na Domsorai sha ka jaka ïingmane Balang U Blei, Sngimietnah (MG Road), ban shna bad pynbha ïa ka surok na Domjawmat sha Mawlyngdep (MG Road), ban shna bad pynbha ïa ka surok na Kpepbru sha Pungwat (MG Road), ban shna bad pynbha ïa ka surok na Dibah sha Phodiawpah (MG Road).
Ban shna bad pynbha ïa ka surok na Mawkohlong sha Jyrwiñ (MG Road), ban sna bad pynbha ïa ka surok na Pyndenumdoh sha Sakwang (MG Road), ban shna bad pynbha ïa ka surok na ka jaka sah jong u Lodi sha Phodmalam (MG Road), ban shna bad pynbha ïa ka surok na Janaingap sha Pyndenumdoh (MG Road), ban shna bad pynbha ïa ka surok na Pyndenspar, Pungthroin sha Tynrong (MG Road), ban shna bad pynbha ïa ka surok na Petrol Pump, Pyndenspar sha Maweitsim (MG Road) bad ban shna bad pynbha ïa ka surok na Pyndenspar, Pungthroiñ sha Mawkohlong (MG Road).
Ha kane ka jingjurip la synran lang ïa u da u Bah Renikton Lyngdoh Tongkhar, MLA ka Mawkyrwat Constituency, u Bah Joel P. Marbaniang, Executive Engineer ka PWD (Road), Mawkyrwat Division, u Bah Banjop Shylla, Sub-Divisional Officer ka PWD (Road), Mawkyrwat Division, u Bah I. Lawrynïang, Block Development Officer ka Mawkyrwat C&RD Block, u Bah Pascal Wahlang, u Myntri Shnong Jakrem, ryngkat bad kiwei pat ki ophisar bad ki nongïalam shnong.