Ban lait na ki jingleh thok ha ka sngi thep vote yn ym ai shuh ïa ki voter slip

By Mawphor Editor On Feb 18, 2025

Electronic Voting Machine, EVM with male hand voting sign pressing button casting vote Indian election 3D illustration

Khliehriat Rymphang 17: Ka Ophis jong u District Election Officer, East Jaiñtia Hills District ka pynbna paidbah ba ka sorkar lyngba ka shithi No. DCA.4/2025/6, Dt. 31.01.2025, ba la pynmih da ka District Council Affairs Department ka la bthah ba na ka bynta ban lait na kano kano ka jingleh thok ha ka sngi thep vote bad ruh ban pynsuk ha ka ba por thep vote ha ka 21 tarik rymphang 2025 ka pynbna paidbah ba ha katei ka sngi yn nym ai shuh ïa ki slip ne ki voter slip sha baroh ki nongthep hynrei ki nongthep vote ki lah ban pynithuh ïalade da kaba pyni da ki kot kiba donkam.
Kumjuh ruh ka Ophis jong u District Election Officer, East Jaiñtia Hills District ka pyntip ba yn ym ai Voter Slip shuh sha ki Booth Level Officer ruh.
Ha ka sngi thep vote ha ka 21 tarik rymphang ki nongthep vote ki lah ban pyni da kano kano ka kot ban pynshisha kum ka Epic, lane Passport, lane Driving Licence, lane Income Tax Identity (PAN) Cards, lane ka Bank Passbook ba la ai da ki Public Sector Banks/ Post office and Kisan Passbooks kiba don bad ki dur shiteng, lane ki syrnot SC/ST/OBC Certificate ba la ai da ki bor ba dei khmih, lane ki kot ki sla Pension na ka bynta ki Ex-Servicemen’s,Pension Book/ PPO/ Ex-Servicemen’s Widow/, ki syrnot kum ki Dependent Certificates, Old Age Pension Order, Widow Pension Order ryngkat ki dur, lane ki Laisen tiar siat ba la ai da ki Tnad ba dei khmih, ki Syrnot na ka bynta kiba don jingduna ha ki dkhot met ba la ai da ki bor ba dei khmih, lane ki Job Cards ba la ai hapoh jong ka MNREGA ryngkat ki dur, lane Health Insurance Scheme Smart Card bad ki dur, lane ki School Certificate ba la ai da ki bor pyniaid skul ba la ithuh da ka sorkar ne da ki bor sorkar ka thain ha ryngkat ki dur, lane ki Syrnot jaka shong jaka sah ba pura ba la ai da ki bor District, lane ki bill bai bording ne Electricity Bills, Aadhaar Card, ki Service Identity Card ba la ai sha ki nongtrei na ki tnad ka Sorkar Pdeng / Sorkar Jylla ryngkat ki dur.
Nalor kata la pynshlur bad la kyntu ruh ïa baroh ki nongthep vote ban ïa mih paidbah ha ka ban ïa leit shim bynta ha ka jingiathep vote ha ka 21 tarik Rymphang 2025 kum ka dak ban pyndep ïa la ka jong ka hok bad ka kamram.