Ban kyntiew ïa ka kam rep Soh Phlang pynlong ki samla Katholik da ka tamasa ha Mawkynrew
Shillong, Risaw 22 : Ka Seng Samla Katholik Holy Cross Parish Mawkynrew ha ka jingïatreilang bad ka tnad Arts and Culture, Tourism, Meghalayan Age Ltd, HFU, Finance Department NESFAS bad u MLA ka Mawkynrew Constituency, kum shi bynta ban kyntiew ïa ka kam rep soh-phlang, ka la pynlong da ka tamasa soh-phlang ha madan ka Holy Cross Higher Secondary School ha ka 21 tarik u Risaw, 2023.
Ha kane ka tamasa ki nongshong shnong lyngba ki Self Help Group ha kane ka thaiñ ki la wanrah ïa ki tiar ki tar ban die, nalor ki jingbam tynrai ba kynthup ïa u soh-phlang, u khniang phlang, ki jingdih bad kiwei pat.
Nalor kine, ki la don ruh ki jingrwai jingshad na ki samla bad nongshong shnong ka thaiñ ban pynshongshit ïa kane ka tamasa ha ka sien ba nyngkong halor une u jait jingbam tynrai.
La wan ban ïa donlang ha kane ka sngi da u Bah Banteidor Lyngdoh, MLA, u Bah Commander Shangpliang, President HFU, u Bah Pius Rani, Executive Director ka NESFAS, ki nongïalam ka Seng Samla ba kynthup ïa u Bah Pynbiang Kshiar, u Bah Carmel Lyngdoh, nongai-jingmut, ki dkhot balang nalor kiwei.
Haba kren ha ka jingïalang, u Bah Banteidor Lyngdoh u la pynpaw ka jingsngewkmen ba ryngkat kiba ïa don bynta lang baroh ki la lah ban pynlong ïa kane ka tamasa kaba jop bad bynrap ba kane ka tamasa yn pynlong noh man u snem.
Da kaba pynpaw ba ka Constituency jong u ka dei kaba la kyrkhu da ka mei mariang, u la ong ba ki jaka jngohkai kiba don ha Mawkynrew ki la kylla long ki jaka kiba ki nongwan jngohkai ki wad bha mynta ki por.
U la ong ba ki jaka kum ka Nongjrong, Laitlum, Nohron, Syntung bad kiwei pat la ïaroh da kiba bun hynrei hap shuh shuh ban pynbiang pynbit ïa ki. “Ngi kwah ba ka kam jngohkai kan dei ka bynta ka ban ai jingkyrshan ïa ki nongshong shnong ha ka ïoh ka kot”, u la ong.
Na ka liang kiba pynlong ïa kane ka tamasa ki la ong ba kane ka tamasa ka ai ka lad ïa ki nongshong shnong ban ïa long kawei bad ïasnoh kti lang ban pynshongkun ïa ka. Kane ka tamasa ka long kum ka rynsan ïa ki khun samla ban pyni ïa ki sap ki phong kiba ki don la ka long ha ka shad ka rwai, ka put ka tem nalor kiwei .