Shillong, Rymphang 04: U kyrtong ka United Democratic Party (UDP) na Mawlai constituency bah P.T Sawkmie ula ong ba ka mat ba hakhmat jongu ban ïakhun ha kane ka elekshon ka dei ban kyntiew kyrdan noh iaka Mawlai C& RD Block sha ka Civil Sub Division nalor kiwei kiwei de ki mat.
ïa kane u bah Sawkmie ula ong hadien ka jingthep kyrteng naka bynta ban ïakhun ha kane ka elekshon ka ban long ha ka 27 tarik mynta u bnai.
U bah Sawkmie ula ong ba ka Mawlai kadei ka constituency kaba heh tam ha Meghalaya bad dei namar kane la donkam ban don noh daka Civil Sub Division naka bynta ban pynïoh shuh shuh ki kam pynroi hapoh ka thaiñ.
“Naduh ki por ba nga don haka Liang Pyrshah nga la angnud ban pynïoh ïa Civil Sub Division ha Mawlai constituency hynrei ha kato ka por ngam don ha ka bor bad dei namar kane nga khlem lah ban pynmynjur ïa ka sorkar ban ïoh ïa kane” la ong u bah Sawkmie.
U bah Sawkmie ula kam ba u la trei shitom bha baroh san snem na ka bynta ka constituency, khamtam ha ka por u COVID bad kum u MLA ka thaiñ u khlem iehnoh ïa ki paidbah bad hadien kane ka ilekshon ban wan ruh un ïai bteng ban shakri ïaki paidbah ka thaiñ bad ka jylla baroh kawei.
U la kyntu bad kyrpad ïa ki nongthep vote baroh jong ka Mawlai constituency ba kin ailad biang ïa u ba un long u MLA jong ka Mawlaiba un dang ïoh ban shakri hok shuh shuh ia ki paidbah.
Halor ka jingshah kynnoh ba ka UDP ka don bynta lang bad ka NPP ha ka sorkar MDA ha kiba bun ki kam bad kumno kan sait khuid haba ïa dei ïa kane, u pynpaw ba u dang shu rung thymmai sha ka UDP, hynrei ka jingïohi jong u na jngai ka long ba ka NPP kam burom ïa ka UDP bad ïa ki paralok kiba don ha ka MDA.
U kubur ba ki don lang, hynrei kaei kaba u ïohi ka long ba u pilot uba niah ïa kane ka liengsuiñ u dei na ka NPP bad une u pilot u dei uba niah kulmar bad u bym pat ih bha ka pyrkhat pyrdaiñ, u bym shim jingbahkhlieh ïa la ki jong ki paralok ha ka sorkar MDA.
U la kynnoh ruh ba wat ha ka por synshar ka Congress, u Dr. Mukul Sangma u la leh dictator bad kumjuh hapoh jong ka NPP ba la ïalam da u Conrad K Sangma, ki leh dictator kumjuh.
