Shillong, Nailur 27: Ka Myntri ka Koit ka Khiah Kong Ampareen Lyngdoh, ka la plie paidbah ïa ka First Referral Unit (FRU) ha Mawphlang Community Health Centre (CHC).
Haba kren ha ka jingïalang ha ka sngi Thohdieng, ka Myntri ka la ban jur ïa ka jingdonkam ban shaniah ïa ki jaka sumar ka Sorkar haba kdat sharud ïa ka jingmut jingpyrkhat ba ki dei ki bym biang satia ïa ki lad jingsumar. Na ka liang jong ka ka la banjur ruh ba ka thong jong ka Sorkar ka long ban rah shajan ïa ki lad jingsumar kiba paka sha ki longïing ha ki shnong ki thaw. Ka Myntri ka ong ba ka Mawphlang CHC ka la nang kyntiew ïa ki tiar sumar bad don haduh 5 ngut ki doktor, uwei u doktor Specialist, lai ngut ki doktor bniat bad uwei u doktor Ayush. Ka CHC ka la lah ban leh haduh 39 tylli ki medical test, kaba la pyllait ïa ki paidbah ban hap wan hiar shaduh sha Shillong. Ha kajuh ka por, ka Myntri ka la kyntu ïa ki Nongshong shnong ban pynrung kyrteng ïalade hapoh ka Meghalaya Health Insurance Scheme (MHIS) bad ban pynïasoh bad u Aadhaar ban ïoh ïa ki jingsumar ei.
