Ban ïoh bhah lang baroh ki khun, yn rah biang ka KHADC ïa ka Inheritance Bill ha Ïing Dorbar

Shillong, Lber 15 : Ka Khasi Hills Autonomous District Council ka la pynkhreh mynta ban rah biang ha Ïing Dorbar ïa ka KHAD (Khasi Inheritance of Property) Bill, ka bill na ka bynta ban pynïoh lang kumjuh ïa ka jingdon jingem jong ki kmie ki kpa sha baroh ki khun Khasi ba pura kynthei bad shynrang.
Haba kren bad ki lad pathai khubor, u Chief Executive Member ka Council, Bah Titos W Chyne u la ong, “Kumba long mynta na ka liang ka Council ngi dang pynkhreh ban wanrah ha kane ka sien shong Dorbar kaban wan ïa katei ka Bill kaba ngi la wanrah teng ha ki por ba la dep.”
Nalorkata, u ong ruh ba kane ka Bill mynta ka dang sahkut ha ka Select Committee bad kumta shen kin sa shong noh ïa ka Committee khnang ba kin ïoh pat ban pan ïa ka jingai jingmut na ki paidbah ka jylla kumjuh na ki seng bad ki kynhun bapher bapher haba ïadei bad katei ka Bill.
Shwa kane, u CEM u la ïathuh ruh ba katei ka Bill kadei kaba la wanrah khnang da ka Council na ka bynta ban peit ba baroh ki khun la ka long shynrang ne kynthei kin ïoh lang ïa ka bhah ne ka jingïoh pateng ïa ka spah bad ka jingdon jingem jong ki kmie ki kpa khlem da shah liang.
“Kane ka Bill kadei halor ka jingai bhah jong ki kmie ki kpa ïa ki khun namar kane ka plie lad ïa ki kumno ban pyrkhat ban ai bhah lang ïa baroh ki khun,” la bynrap shuh shuh u CEM.
La ïathuh ruh ba ïa katei ka Bill kin sa rah ha ka Dorbar Mangtyngka kaba pura kaban sa long la kumno kumno ha u bnai Jylliew ïa kaba ju tip kum ka Dorbar Lyiur.
Katei ka Bill, kaban peit ïa ka jingsam bhah sha baroh ki khun kiba dei na ka Jaidbynriew Khasi, hynrei khlem da ktah pat ïa ki aiñ kiba la don lypa, kiba la kdew ba ka khun khatduh ka don ïa ka hok ban ïoh ïa ka nongkynti jong ki kmie ki kpa.