Nongstoiñ, Naitung 24: Ka Nongstoiñ ne ka West Khasi Hills hi baroh kawei ha ka lah Sngi U Blei ka la ïoh sa kawei ka College bad kata kadei ka Synod College, Nongstoiñ.
Ïa kane ka College la Seng da ka KJP Synod Sepngi ryngkat ka jingiatreilang bad ka Synod College, Shillong.
Kane ka College ka don ha Tiehsaw, Nongstoiñ ha syndah jong ka Skul KJP Synod Higher Secondary School, Nongstoiñ.
La plie ïa ka College ha ka jaka ba tei shipor da u Myntri ka tnad pule puthi u Rakkam Sangma uba long u Kongsan ha jaha u Myntri Rangbah, u Conrad Sangma uba ym shym lait wan ha kane ka sngi.
Ka College kan sdang noh naduh u bnai ban wan kaba dei ka snem sdang long college ne ka academic year.
Katkum ka jingïathuh u Principal ka Synod College, u Dr. RB Lyngdoh, uba dei peit shipor ia kane ka College ki samla kiba lah wan shim admission ki long 45 ngut. Ka College kan dei shuwa ka Arts Stream.
U Dr. Lyngdoh u la iathuh ba ka daw ba ka Synod ka plie ia kane ka College kadei namar ba bun ki Samla Pule kiba wan ha Synod College Shillong bad kiwei de ki College ha Shillong kumba 70 percent kidei na West Khasi Hills bad kiwei de ki jaka Nongkyndong.
Nalorkata u la ong ba ki don pat kiba wan na ki longïing baduk ki shem jingeh ban pyndep ia ki jingpule ha Sor namar ba ka ktah ia ka jinglut jingsep.
U kyrmen ba da kane ka jingplie ka Synod ia kane ka College kan wanrah ka jingmyntoi kaba khraw ïa ka Nongstoiñ bad ia ka West Khasi Hills hi baroh kawei.
U Rakkam ha ka jingkren jong u, u la ong ba kuk u Khristan u sngew sarong ïa ka jingtrei ba radbah jong ki Mishineri kiba la wanrah ia ka jingnang jingstad da kaba seng ïa ki Skul bad College ha kylleng ki jaka Jong ka jylla. U la ong ruh ba ka jylla kadei ban ia beh sha ka jingnang jingstad khamtam mynta lei haba yn pyntreikam noh ïa ka National Education Policy kaba la pynmih naduh ka snem 2020.
Na ka liang jong u, u la ong ba un ïakren ba ka sorkar ban ïatreilang bad kane ka College ba dang thymmai.
Ha kane ka sngi la ïadon lang ki Pastor jong ka Synod, ki TymmenBasan, ki Nongmihkhmat ka Synod College, Shillong bad ki paidbah na Tiehsaw bad kumjuh ruh ki Ophisar sorkar na Nongstoiñ.
Ha kane ka sngi, na ka liang jong u myntri u la kular ba ka sorkar kan iatreilang bad ka kolej na ka bynta ban kyntiew shuh shuh bad ban iarap ia ka kolej haba ka iakynduh ia kino kino ki jingeh.
Katba, u Symbud kongsan, u Bah Gabriel Wahlang uba dei u MLA bad MDC jong ka Nongstoiñ, u la pynpaw ka jingsngewkmen ban iohi ba sa kawei pat ka kolej kan don hapoh sor Nongstoiñ, namar haduh mynta ka Nongstoiñ ka dang don tang ar tylli ki kolej.
U la ong ruh ba ka jing plie ïa ka Synod College Nongstoiñ kan ïarap shibun eh khamtam ïa ki khynnah kiba wan na ki longïing kiba duna ha ka ïoh ka kot. U Bah Gabriel u la kyntu jur ïa u myntri ka tnat pule puthi ba un theh ïa ki lad jingiarap na ka bynta kane ka kolej khnang ba ka lah ban ai ïa ka jingshakri kaba paka tam bad hadien habud kan lah ruh ban pynmih ïa ki nongpule kiban long ki IAS, IPS, MCS bad kumta terter.
Na ka liang jong u President ka Governing Body, Synod College, U Pastor S.S. Majaw, haba ai jingkren ha kane ka sngi u la pynpaw ka burom ïa U Blei, U ba la btin lynti ïa ka Synod ban plie ïa kane ka kolej. U la ai khublei ïa baroh kiba la ïa don bynta lang ban pynurlong ïa kane ka jingthmu kaba bha jong ka Synod bad u la kyntu ïa ka jingiatreilang jong baroh, khnang ba kane ka kolej kan nang kiew na kawei ka snem sha kawei pat.
La ïoh ruh ïa ka jingkren ai khublei na u Dr R.M Lyngdoh, Principal, Synod College Shillong u ba la ai khublei ïa baroh kiba la wan sakhi lang ha kane ka sngi sah jingkynmaw na ka bynta kane ka kolej.
