Dawa ka JSM na u Myntri Rangbah ka jylla ban pynlong Spring Capital ïa ka nongbah Jowai

Khliehriat, Naitung 24: Ka Jaiñtia Students Movement, mynta ka sngi ka la leit ban buh da ka jingthoh ha u Deputy Commissioner West Jaintia Hills District bad lyngba kane ka shithi ka seng ka dawa na u myntri rangbah ka jylla, u Conrad Sangma ba dei ban pynurlong ïa ka nongbah Jowai kum ka Spring Capital.
Shuh shuh ha ka shithi ba la soi kyrteng da u President JSM, u bah Leningstar Rymbai bad u General Secretary, u bah Roitre Dkhar, ka seng ka la pynpaw ba katei ka jingthmu ban pynlong Spring Capital ïa ka Jowai ka dei kaba u myntri rangbah ka jylla hi u la dep khlei ïa ka kular myn ha u bnai nohprah jong u snem 2022, ha ka por ba u wan ban plie ïa u maw nongrim ban shna ïa ka Mini Secretariat ha Jowai
La ong ruh ba kane ka jingdawa ka dei ruh halor ka nongrim ba ha ka jylla Meghalaya ka don lai tylli ki thaiñ ba kynthup ka ri lum Khasi, ka ri lum Garo bad ka ri lum Jaiñtia bad ka don ruh lai tylli ki District Council, ka Khasi Hills Autonomous District Council, ka Jaiñtia Hills Autonomous District Council bad ka Garo Hills Autonomous District, napdeng kine, ka ri lum Jaiñtia ka dei ka thaiñ kaba ju pynioh khajna bha ïa ka sorkar khamtam ha kito ki por ba dang shah bad ailad ban tih bad khaiï ia u dewïong.
Na ka liang ka seng ka ka khmih lynti ba ka sorkar kan shim khia halor kane ka jingdawa jong ka seng ban pynlong ïa ka Jowai kum ka Spring Capital ha West Jaiñtia Hills District kaba long ruh ka jingkwah jong baroh ki paidbah jong ka ri lum Jaiñtia.
Ïa katei ka jingthoh ba ka seng ka phah sha u Myntri rangbah ka jylla, la phah copy ruh sha u Chief Secretary jong ka jylla.