Ban bat mar ar snem shiteng ïa ka shuki Myntri, nga pdiang katba rai ka party: Bah A.L Hek

Shillong, Jylliew 28 : U MLA ka BJP na Pynthor ba dei ruh u Myntri ka tnad Veterinary ka sorkar jylla, Bah AL Hek u la ong ba u shaniah beit ha ka rai jong ka party haba ïadei bad ka jingong ban ïa sam mar arsnem shiteng bad u MLA ka Shillong South, Bah Sanbor Shullai, ban bat ïa ka shuki Myntri ha ka sorkar jylla.

Haba kren bad ki lad pathai khubor dang shen, u Bah AL Hek u la ong, “Ïa kane ka kam nga shaniah beit ha ka rai jong ka party. U Bah Hek lei u pdiang beit ïa kano kano. Ka shong ha ka rai jong ka party.”

Lada katei ka jingkyllïang shuki ka urlong shisha, kamut ba ïa ha ki arsnem shiteng kiban wan ïa ka shuki Myntri kaba bat da u Bah AL Hek baroh shi katta yn sa shimti noh da u Bah Sanbor Shullai kumba leh ha ka samoi ba la dep.

Dang shen, na ka liang u President ka BJP u Rigman G Momin ruh u la pynpaw ba ïa ka rai kaba ïadei bad ka jingbujli shuki myntri ka shong beit ha u Myntri Rangbah.

Da kaba kyntait ban ong ei ei la kane ka jingkylliang shuki myntri kaba mar arsnem shiteng kan long biang kumjuh kumba la leh ha ka sorkar MDA hapdeng kitei ki arngut ki MLA, na ka liang u President u la ong, “Ïa kane ngam ym pat lah ban jubab ïa mynta hi. Tangba ka rai hi ka shong ha u Myntri Rangbah.”

Lah ban pynkynmaw hangne, ba ki la mih bun ki khubor ba kin don bun tylli ki party ba don ha ka sorkar MDA kiba khihwin mynta ban don ka jingïakylliang shuki myntri ha ka sorkar. Kine ki kynthup ïa ka HSPDP bad ka BJP kiba don mar arngut ki MLA, nangta kumjuh ruh na ka NPP.

Watla haduh mynta ym pat lah ban pyntikna ba katei ka jingkylliang shuki kan treikam neem hynrei ki khubor kiba phriang ki ïathuh ba na ka NPP ki don arngut kiba bujli shuki Myntri bad marwei pat na ka HSPDP.

Haba pyrshang pat ban ïakren bad u Symbud Myntri Rangbah ka Jylla, Bah Prestone Tynsong  ula ïathuh ba haduh mynta hi um pat don jingtip ei ei halor kane ka bynta. Tangba u shu ong ba ïa kane ka rai bujli shuki Myntri ka shong beit ha u Myntri Rangbah.

“Halor kata ka kam ïabujli Myntri ngam don eiei ban ong, ngam don jingtip hynrei haba ïadei bad ka jingbujli Myntri, ka shong pat ha ka rai jong u Myntri Rangbah ka Jylla u Conrad K Sangma”.

U Bah Prestone u la ong ba ka shong ha ka mon jong u Myntri Rangbah, la ka i donkam ne em ban bujli ïa ki Myntri.

Lah ban kdew ba hadien ka jingïaid ar snem shiteng naduh ba la shimti biang ka Sorkar MDA, ka la don ka jingïakren ba ka lah ban don ka jingbujli Myntri ïa ki katto-katne ngut ha u bnai ban wan.