Shillong, Lber, 16: Ki thylliej ding barhem ki la pynkylla dpei ïa kawei ka ing ha ka shnong Sohkynduh, ka shnong kaba hap hapoh ka thaiñ Khatarshnong, Sohra, East Khasi Hills District.
Katkum ka jingtip ba la ïohlum la ïathuh ba kane ka la jia ha ka sngi Saitjaiñ ha ka por kumba 3:00 baje noh phai sngi. Kane ka ing ka dei ka ing jong ka Kong Baralin Mawpat bad u Bah Phainal Phanbuh.
Ka ding ka la ïoh ban bamduh ïa ka iing baroh kawei namarba ka dei ka ing tap tin shiliang bad baroh ki jingdon jingem hapoh ka iing ki la kylla dpei tang hapoh shikhyllipmat.
Ha kane ka jingjia ym shym la don mano mano ruh ba mynsaw.
