Shillong, Lber 16: Na ka daw ba ka Election Commission of India ka la pynbna ban pynlong ïa ka ilekshon sha Lok Sabha 2024 ka ban long ha ka jylla ha ka 19 tarik u bnai ïaïong 2024, kumta lyngba ka bor ba la pynkup hapoh ka kyndon jong ka 144 jong ka Criminal Procedure Code, 1973 bad hapoh Section 21 (1) kaba pule lang bad ka Section 17 (3), (a) bad (b) jong ka Arms Act 1959, na ka liang ka ophis District Magistrate la bthah ïa baroh kiba la ïoh ïa ki laisen ban buh ïa ki suloi bad ki kuli ba kidei ban leit buh noh hapoh ki Police Station/Outpost/Beat-House kiba don hajan ha ki naduh ka por ba la pyntreikam ïa ka Model Code of Conduct khnang ban pynthikna ba ka jingpynlong ïa ka General Election sha ka Lok Sabha 2024 kan long kaba ïaid beit ïaid ryntih.
Lada don ki bym ïatreilang bad kane ka hukum kan don ka jingpynngat hapoh ki kyndon jong ka Section 25, 1 B, (h) kaba pule ba lada ym lah ban pynpoi ïa kitei ki tiar siat kaba ïaid lang ruh bad ka Sub Section (1) jong ka Section 21.. .. , kin shah pynshitom da kaba shah set patok kaba ym duna ïa ka 1 shisnem hynrei kaba lah ruh ban pynjlan sha ka 3 snem kaba lah ruh ban ïaid lang bad ka jingshah daiñ kuna.
