Boko, Jylliew 24 : Ha ka miet jong ka sngi Ba Ar ka la don ka jingpluh kaba jur ha Dakuwapara ha Boko, Assam, ha kaba 3 tylli ki dukan kiba don harud surok ki la shah bam duh ha ki thylliej ding bad pynsyier ruh ïa ki nongshong shnong.
Kane ka jingpluh ding ka la sdang na ka bynta kaba shakhmat jong ka Kalyani Hospital bad ka la pur sted sha ki jingtei hashwa ban wan poi ki kali pynlip ding ha katei ka jaka. Ki nongshong shnong kila suba jur ba kane ka jingpluh ka lah ban dei na ka jingbthei jong ka Gas Cylinder, hynrei ïa kane haduh mynta ym pat lah ban pynshisha.
Kine ki dukan kiba la shah bamduh ha ka ding, ki dei kiba la longtrai da u Dulal Das bad arngut kiwei pat ki nongkhaïi, ha kaba ki la mad ia ka jingduh nong kaba khraw haba baroh ki jingdon jingem kila kylla dpei lut.
Ki pulit jongka Boko Fire and Emergency Services kila leit mardor sha katei ka jaka bad pynlip ïa katei ka ding kaba la klang bha bad khatduh ki la lah ban tem noh ïa kane ka ding hadien bun kynta.
Ha kane ka jingjia ym shym la don mano mano ruh kiba mynsaw bad ka jingtohkit halor kane ka jingjia ka dang ïaid shakhmat.
Kiba bun ki paidbah ki la pynpaw ïa ka jingsngewkhia ha kaba ïadei bad ka jingshngaiñ bad ka jingdonkam ïa ki lad ban ïada na ki jingpluh ding khamtam hapoh ka jaka ïew, kiba don ïa ki dukan kiba mar syndait bad ka jingpyndonkam ïa ki LPG Cylinder ka dei kaba buh jingma bha.
