Shillong Jylliew 24: Ka Meghalaya & Greater Shillong Progressive Hawkers and Street Vendors Association (MGSPH&SVA), ka la pyntip ba mynta u snem, kane ka Seng ki nongdie madan ka la kynjoh shiphew snem ha ka jingtreikam bad jingïakhun jong ka na ka bynta ka kamai jakpoh bad ka hok ki nongdie madan, ki nongtrei nongbylla bad ïa ka hok longbriew manbriew.
“Kum shi bynta ban rakhe ïa kane ka lyngkhuh snem ba shiphew, ka seng kan pynlong ïa ki prokram kiba lai sngi lynter naduh 25-haduh 27 Jylliew 2026 ha All Saints Hall, IGP, Shillong” la ong ka President, Kong Lasara Marbaniang ha ka kyrwoh bad ka bynrap ha ka kitei ki 3 sngi, man la ka sngi kan don ka ïew paidbah bad la khot sngewbha ïa baroh ki nongshong shnong ban ïashim bynta da kaba wanrah ïa ki tiar ne ki mar ban die.
La ong, ba kino kino kiba don jingthmu ne kiba kwah ban die jingdie ki lah ban phone shuwa ha une u number- +91 87318 16794 bad kane ka ïew paidbah kan plie naduh ka por 10 baje mynstep.
Ka Kong Lasara kala pyntip ba ha ka 25 tarik kan don ka prokram lehkmen jong ka seng ka ban sdang naduh ka por 10 baje mynstep bad ha ka 26 tarik ha ka por 10 baje mynstep, kan don ka jingïaphylliew jingmut hapdeng ki riew paidbah halor ka phang ka jingpyntrei kam ïa ka Digital Infrastructure ka ban myntoi ïa ki nongtrei nongbylla.
Ha ka 27 tarik kan don ka jingiaphylliew jingmut halor ka phang, ka jingdheng kali ha Nongbah Shillong bad kiwei de ki jingeh ba ki nongshong shnong ki ïakynduh bad ïa kane ka prokram ruh yn sdang naduh ka por 10 baje mynstep.
Ka la pyntip ba ha kitei ki 3 sngi kin don ruh kiwei ki jingpyn sngewtynnad, kum ki jingleh drama, ki jingrwai bad kiwei bad ïa ka jaka ban pynlong ïa kitei ki prorkam kan dei ha All Saints Hall, IGP kaba don marjan bad ka Additional Secretariat bad ka Seng ka ïawer bad khot sngewbha ïa baroh sha kitei ki program.
