Wat hapdeng ka jingpyrshah na baroh ki liang, hynrei ka jingtei ïa ka Casino lane ka jaka ïakhalai ha Jorabad, Ri Bhoi District ka la nang ïaid beit shakhmat.
La jan baroh ki sengbhalang bad kynthup ruh ïa ka Ribhoi Dorbar kaba long ka synjuk jong ki Rangbah Shnong bad kynthup ruh ïa ki Seng jong ki Nongïalam Niam na ka them Ribhoi ki la ieng pyrshah ïa kane ka jingthmu halor ka nongrim ba ka jingbuh ïa kane ka jaka ïakhalai kan pynlong ïa ka Ribhoi District kum kawei na ki jaka kaba pawnam ha ka jingïakhalai ha kane ka jylla Meghalaya.
Kane ka Casino kan dei ruh kaba nyngkong eh ha kane ka thaiñ Shatei Lammihngi jong ka ri India bad ka ban wanrah ruh ïa ka jylla Meghalaya ha ka map jong ka ki jaka ïakhalai jong ka pyrthei.
Kane ka jingïakhalai kaba long da ka rukom ïakhalai jong ka juk kaba mynta ka long hadien ba ka Sorkar MDA ka la wanrah ïa ka aiñ Meghalaya Regulation of Gambling Rules 2021 da kaba pyndam noh ïa ka Meghalaya Prevention of Gambling Act jong u snem 1970.
Ka jingtei ïa kane ka jaka ïakhalai ka la ïaid shaid shaid mynta ha Jorabad ha kaba la tei ïa ka Building kaba heh, kaba ka Sorkar ka ong yn shah tang ban ïakhalai tang ki Nongshang pyrthei lane ki briew kiba wan shangkai pyrthei na shabar.
Kane ka jingkhih ban pynlong aiñ ïa ki kam ïakhalai ka long hadien ka jingïakynduh u Myntri ka tnad Khajna jong ka jylla, u James K. Sangma bad ki Nongmihkhmat na ka UK India Business Council (UKIBC), ha kaba la lap ba ka Meghalaya kadei ka jylla kaba biang tam ban pynlong ïa ki kam ïakhalai. Ka Sorkar Jylla ka khmihlynti ba kan ïohlum shibun ka khajna na kane ka jaka ïakhalai.
Hynrei na ka liang ka Sorkar kam shym la sngap satia bad ka la ïa beit shakhmat ban pyntreikam beit ïa kane ka aiñ, da kaba pyntrei ïa kane ka jaka ïakhalai ne ka Casino ha Jorabad.
Kat kane ka jingïakynduh jingeh jong ki paidbah ha ka pang ka shitom bad khamtam sha ki shnong nongkyndong ki bm don wat tang ka surok ba kit ïa ki bapang ba shitom, hynrei ka Sorkar ka la leh bym suidñiew ban shna da ki Hospital ki ban pynmyntoi ïa ki paidbah ha ka jaka jong ka Casino.
Lehse ïa mynta ka Sorkar Jylla ka ong ba kane ka jaka ïakhalai kan dei beit thik tang na ka bynta ki nongwan jngohkai pyrthei. Hynrei mano ban tip lehse tang hadien katto katne snem kane ka jaka ïakhalai kan long pynban ka ktem ïakhalai kaba baroh ki heh spah kane ka jylla kin ngop bad kan long pynban ka jaka ïakhalai kaba plie jingkhang lut kat ïa uba don pisa.
Ha kane ka juk Smart Phone, kiba bun ki briew ki la ngop ha ka khalai Online. Don kiba la duhnong da ki lak tyngka ka pisa tang namarba ki bang ïa kane ka jingïakhalai Online.
Ban pynïaryngkat kyrdan ïa ka Jylla Meghalaya bad ki Jylla kiba shabar kiba la paw bha ha ki kam jngohkai pyrthei bad kiba kham khring bha ïa ki nongjngohkai pyrthei kiba nabar ri kam pat ïahap kyrdan satia namarba ka jingwan shang suwari jong ki briew kiba nabar ka ri India sha kane ka jylla Meghalaya ka dang duna haduh katta katta haba ïanujor bad kiwei kiwei ki Jylla hapoh ka ri India.
Lada ka jingbuh ïa ka Casino kan wanrah ïa ka jingduhnong kaba jur namar ka jingduna jong ki nongshang suwari nabar ka ri India, khlem pep, ka Sorkar kam banse ban ai jingbit wat ïa kiba nabar ka jylla ruh ban rung ha kane ka casino da kaba wanrah ïa ka jingpynbeit thymmai katei ka aiñ kaba la kdew haneng.
