Manla ki jingpang bad ki jingshitom la ka dei kaba ktah ka bor met ne ka bor jabieng baroh ki dei kiba paw ki long kiba don jingma. Lada kren halor ka jingshah ktah ka koit ka khiah ka bor jabieng ba lah ban sakhi kum ka jinglong artatien, ka jingkhuslai, baroh kine ki dei kiba lah ban ktah ïa baroh bad kam pyllait satia hapdeng kiba heh ne kiba rit ne ka jingpaw ka jinglong kynthei shynrang napdeng kiwei de ki daw.
Hynrei ki daw halor ka jingngat ha kine ki jingshitom bad kumjuh ruh ki dak ba pyni halor kine ki jingshah ktah ka lah ban ïapher na uwei u briew sha uwei pat ne katkum ka rta. Bunsien ka jingshah ktah bad ngat ka jingshitom halor ka jinglong khuslai ka dei kaba lah ju pdiang ba lah ban sakhi hapdeng ki samla hapdeng ba ki kynduh jingeh ha ki kam ba ki trei ne ka jingïadei bad kiwei pat, bad kumjuh ruh ha kito kiba la rangbah kiba lah ban don ka jinglong kynjah marwei bad ka jingsngewsih, hynrei ym shym la pdiang satia ba kane ka lah ruh ban ktah ïa ki khynnah.
Ki dak jingshitom halor ka jingkhuslai ha ki khynnah bad ki samla :
Ka jinglong atlukhi bad pyni ka jingdom : Haba kiba la kham heh ne ki samla ki don hapdeng ka jingkhuslai, ki dei kiba ju sngap jar bad paw ka durkhmat ba sgnewsih. Hynrei lada ki khynnah bad ki khynnah kiba la kham heh ki mad kane ka jingshah ktah ki dei kiba ju pyni ka jinglong atlukhi, ka jingkiew ka jingdom bad ka jingbitar bad don ruh ka paw ba ki jngai na ka jinglong jan bad kiwei pat. Ka jingpyni dak ba tang khyndiat halor ka jingkiew ka jingbitar bad ka jinglong atlukhi ka dei kaba lah ban pdiang hynrei lada kane ka wanjia manla ka por ka lah ban pyni dak halor ka jinglong khuslai.
Ka jingpang ba ktah ha ki bynta jong ka met : Lada ki khynnah ki don kane ka jingshah ktah ha ka liang ka jinglong khuslai bunsien ki ju pyni dak halor ka jingpang ba ktah ha ka met jong ki, ka jingsngew diaw halor ka jingjngai na la ki kmie ki kpa ruh ki pyni dak halor ka jingpang ba ktah ha ki bynta jong ka met hapdeng ba kim lah satia ban pynpaw da ka sur ne da ka jingsngew ba ki don.
Ka jingba ym lah ban lehbha ha ki jingpule : Ki khynnah kiba ju mad kane ka jinglong khuslai la sakhi ruh ba ki mad ka jingduna ha ka pule puthi jong ki. Ki duna ka bor ba lah ban pynleit jingmut bad shimkhia ha ka liang ka pule puthi, kaba pyni halor ka jingduna mark. Hynrei lah ruh ba sakhi, ba ka jingshah banbor halor ka jingleh bha ha ki jingpule ka wallam kane ka jingkhuslai.
Ka jingduh noh ka jinglong sngewtynnad : Bunsien ki khynnah ki don la kajong kajong ka jingsngewtynnad- la ka dei halor ka jinglehkai bad kiwei pat ki para khyndnah, ka jingpyndonkam ki tiar put tiar tem, shad ne kiwei pat. Lada phi sakhi ba ki khynnah ki duh noh kane ka jinglong sngewtynnad ha ki kam ba ki ju juh bad sngewtynnad ban leh ka dei kaba lah ban pyni dak halor ka jingkhuslai.Ka jingjngai na kiwei pat : Kane ka long kaba kham kynrei ban sakhi lang hapdeng kiba la heh la san bad kumjuh ruh ha ki khynnah, hynrei ka dei kaba lah ban pynïapher. Kiba la heh la san hapdeng ba ki mad kane ka jingshah banbor bad don kane ka jingkhuslai ki lah ban jngai na la kijong ki paralok bad kumjuh ruh kiba haïing hasem, katba ki khynnah pat ki dei kiba lah ban jngai na kiba haïing hasem hynrei ym satia na la ki jong ki paralok.
Lait na kitei halor, ka dak ba paw halor ka jingkhuslai hapdeng kiba la heh la san bad ki khynnah ka lah ruh ban ïapher halor ka jingduh thiah duh dem. Hapdeng ba ki khynnah ki mad bad don kane ka jingkhuslai ki lah ban thiah palat ban ïa kaba dei ban thiah, bad thiah kham slem khamtam ha ki sngi shuti. Ha kawei pat ka liang kito kiba la heh lada ki mad kane ka jingkhuslai ki paw ba kim nangthiah nangdem.
