Shillong, Naitung 31: Katba ka nongbah ka dang pynkhreh ban pdiang pynlong ïa ki jingïalehkai na ka thup kynhun Group F jong ka lympung 133rd Indian Oil Durand Cup ha JN Complex, u Bah Shakliar Warjri, Myntri ba dei khmih ïa ka tnad Sports jong ka Sorkar Jylla ha ka nohphai sngi 31 tarik u Naitung u la leit ban jurip ïa katei ka madan ka ba don hapdeng ka jingpynkhreh ïa ka lympung, 2024.
Ka jingleit jurip jong u Myntri ka tnad Sports ka long ar sngi shuwa ba ka jingïakhun ba nyngkong na ka Group F ha nongbah ka ban sdang ha ka 2 tarik u Nailar, 2024 hapdeng ka Shillong Lajong FC bad ka Tribhuvan Army FC ha ka por 4 baje nohphai sngi. Nalor kine ki kynhun ban ïakhun ha ka sngi sdang na kane ka Group, ar tylli ki kynthup ïa ki kynhun ISL, ka Goa FC bad Hyderabad FC.
Ha katei ka sngi ka jingleit jurip la synranlang ïa u Bah Shakliar da ki ophisar ka tnad Sports, ki nongïalam ka Meghalaya Football Association, ryngkat bad kiba mih khmat ia ka Durand Cup Organizing Committee nalor kiwei pat.
Lah ban kdew ba ka jingpynkhreh ka la nang ïaid shaid shaid bad ki sah sa malu mala ki jingpynbit jingpynbiang kiba dang hap ban leh, la ong u Myntri haba kren sha ki lad pathai khubor hadien ka jingjurip.
U la ong ba kumba ka Jylla ka dei ka kaba ieid phutbol haduh katta katta, kumta u khmih lynti ba ka jingdon ka kynhun ïalehkai na ka jylla, ka Shillong Lajong kan pynshongshit ia ki jingïalehkai ha kane ka madan.
Da kaba pynpaw ba ka Durand Cup ka dei kaba la rim bad pawnam bha, kumta kane ka lympung kan ai mynsiem shuh shuh ia kiwei pat ki Club ha ka Jylla.
