New Delhi, Naitung 31: Ka lympung Subroto Cup International Football Tournament kaba la jam mynta sha ka sien pynlong kaba 63 kan sa sdang shen, ha kaba yn sakhi haduh 111 tylli ki kynhun ki ban ïaknieh ïa ka namlahduh ha ki lai tylli ki kyrdan ïalehkai, naduh ka kyrdan Junior Boys, Junior Girls bad Sub-Junior Boys.
Kane ka lympung, kaba la pynkhreh ban pynlong ha kylleng ka New Delhi NCR bad Bengaluru ban sdang naduh ka 5 tarik u Nailar haduh 11 tarik u Nailur, kan sakhi ïa ka jingwanshimbynta kaba bun tam ha ka histori jong ka lympung. Ha ka jingpynbna ha kaba ïadei bad kane ka lympung sha ki lad pathai khubor ha Akash Officer’s Mess, ha ka jingïadonlang u Air Marshal RK Anand VSM, u ophisar ba dei peit ïa ka tnat pynïaid bad u Vice Chairman jong ka Subroto Mukerjee Sports Education Society (SMSES), u ba la wan ha kane ka jingïalang kum u kongsan.
Ka Subroto Cup, kaba la pynlong da ka Subroto Mukerjee Sports Education Society ha ka jingïatreilang bad ka Air Force Sports Control Board, la pynlong nyngkong ha u snem 1960 bad la jer kyrteng ïa ka hadien u Air Marshal Subroto Mukerjee, u ba la wanrah ïa ka jingmut ban kyntiew ïa kane ka jingïalehkai.
Kane ka lympung kan sdang ha ka 5 tarik u Nailar ha kaba ka kyrdan Junior Girls (Under 17) kan long ha New Delhi NCR. Ka Bengaluru kan pynlong ïa ki jingïalehkai ka Sub-Junior Boys (Under 15) naduh ka 19 tarik Nailar, ka kyrdan ïalehkai ki Junior Boys (Under 17), kan sdang ha ka 2 tarik u Nailur ha New Delhi NCR.
Haba ai jingkren ha kane ka sngi, u Air Marshal R.K. Anand VSM, u la ong, “Ka 63rd Subroto Cup kan long shisha ka ban sah jingkynmaw ha ka historic jong kane ka lympung kumba la sakhi ba kin don shibun tylli ki kynhun ki ban ïashimbynta mynta u snem. Ka Indian Air Force bad ka SMSES ki la rai kut ban pynlong ïa kane ka lympung kaba heh bad kaba kham bha man la u snem, ka ban plielad ïa ki khynnah rit ban kiew sha kawei pat ka kyrdan ha ka jingim jong ki. Nga ai khublei ïa baroh ki kynhun kiba la ïohrung sha kane ka tournament bad Nga kitbok ïa kaba bha na bynta jong ki. To ai ba kin ïalehkai ryngkat ka mynsiem kaba hok ban ïatylli kum kita ki nongïalehkai sports.”
ha kane ka kynti, ki nongïalehkai ba kynsai tam lane best player na ka kyrdan Junior Boys & Girls (U-17) kin sa ïohlad ban shah pyntbit hapoh ka Indian Football Centre kaba don ha Austria/Germany, kaba pyni ïa ka jingthrang jong ka Indian Air Force ban kyntiew shaphrang ïa ka grassroots football.
Ha kawei pat ka liang ka ban thaw histori, ki kynhun ba mihkhmat ïa ka Ladakh bad Punjab kin ïashimbynta ha ka sien ba nyngkong ha kane ka lympung, kaba la nang kyntiew ïa ka jingwan ïashimbynta ki Jylla bad Union Territory katba dang ïaid ka por. Mynta u snem, yn sakhi ruh ïa saw tylli ki kynhun nabar ri ki ban ïashimbynta, ba kynthup na Sri Lanka, Bangladesh, Bhutan bad Nepal. Ka Sri Lanka bad Bangladesh kin ïashimbynta ha baroh lai tylli ki kyrdan, katba ki kynhun na Bhutan bad Nepal kin ïakhun tang ha ka Sub Junior Boys (U-15) bad Junior Boys (U-17).
Nalor ka Ambedkar Stadium bad ka madan phutbol Tejas ha New Delhi, ka G.D.Goenka Global School bad ka KIIT World School ha Gurugram kin long ki jaka ka thaiñ Delhi/NCR ban pynlong ïa ki jingïalehkai. Ha Bengaluru, ki jingïakhun yn pynlong ha ASC Centre, Air Force School, Jalahalli, Air Force School, Yehalanka, bad ha HQ Training Command Football Ground.
Ki 111 tylli ki kynhun ban ïakhun ha ki lai tylli ki kyrdan kin mihkhmat ïa ki Jylla bad Union Territories (UTs), ki jaka pule bapher bapher jong ka ri, ryngkat bad saw tylli ki kynhun na bar ri. Haduh kumba 200 tylli ki jingïakhun yn pyndep (kyllumlang baroh lai tylli ki kyrdan).
Yn pynlong ïa ka jingkhmih bad bishar ïa ka rta na bynta ka Sub-Junior Boys ha Bengaluru ban pynthikna ïa ka jingïalehkai kaba hok hapdeng ki kynhun kiba ïashimbynta.
Mynta u snem, ka Govt. Model Senior Secondary School, Sector 37B, Chandigarh ka dei ka lahduh ban ïada ïa ka burom ha ka kyrdan Junior Boys, katba ka St. Patrick’s High School, Gumla, Jharkhand kan ïada ïa ka burom ha ka Junior Girls ha ka sien pynlong kaba 62nd.
Ka Junior Girls (U-17) kan sdang naduh 5 tarik haduh 14 tarik u Nailar, ka Sub-Junior Boys (U-15) naduh 19 tarik haduh 28tarik Nailar, bad ka Junior Boys (U-17) kan sdang naduh 2 tarik haduh 11 tarik Nailur.
