Ba tuklar ka sorkar rai ka NTA ban pynlong eksam CUET hapoh ka jylla

Shillong, Jymmang 13: U Commissioner & Secretary ba khmih ïa ka tnat Pule Puthi u Vijay Kumar Mantri ha ka sngi baar u la pyntip ba ka sorkar jylla ka la tuklar lyngba ka jingkyrshan ka National Testing Agency (NTA), ban ithuh ïa ki jaka pynlong eksam ka Common University Entrance Test (UG) 2025 ha Meghalaya.
Baroh ki samla pule kiba la shah ktah, kiba ha kaba sdang ki la shah bthah ba kin hap ban ïaleh ïa ki eksam jong ki shabar jylla, mynta ka kynti pat ki la ïoh biang ban thoh ïa ki eksam jong ki hapoh ka jylla la jong, ïathuh u Mantri.
Haba ong ba ka jylla kam don bynta eiei haba ïadei bad ka jingbuh ïa ki examination center jong kiba shimet, na ka liang u commissioner & secretary u la ong ba ka long kaba kongsan ban kdew ba ka jingbhah ïa ki examination center la pynïaid beit da ka NTA da kaba pyndonkam ïa ka automated software system. Kane ka jingtreikam ka bhah ïa ki center kaba long halor ka nongrim kaba la aiti da ki kyrtong. Ki kyrtong ki donkam ban pyni saw tylli ki jaka kiba ki la jied, bad kane ka jingtreikam pat ka pyni ïa ki center pyrkhing napdeng kine ki jaka ba ki la jied. Namarkata lada ki samla pule ki la ïoh ïa ki jaka thoh eksam shabar ka jylla Meghalaya, kadei namarba ki la jied ïa la ki jong ki jaka kaba long katkum kaba ki kwah. Kine ki kynthup ïa ki kam ha kaba ki samla pule ki la ïoh ïa ki center kaba long katkum ka Port Blair.
Kumba long mynta ki la don kumba 12,685 ki samla pule na Meghalaya kiba la dep ban pynrung kyrteng na ka bynta ka CUET (UG) 2025. Kumba 7,742 ki kyrtong pat ki la ïoh ïa la ki jong ki jaka thoh eksam ha jylla Meghalaya na ka daw ki jingduna ki jingdon ki centre. Bad 4,943 ki kyrtong ki la ïoh ki jaka thoh eksam shabar Meghalaya. Na kine, 4,654 ki kyrtong ki la ïoh ki jaka thoh eksam ha Assam. Tang 289 ngut ki kyrtong kiba la ïoh jaka thoh eksam shabar jylla Meghalaya bad Assam.
Napdeng kine, tang 93 ngut ki kyrtong kiba la ïoh ki jaka thoh eksam shabar kane ka thaiñ shatei lammihngi.
Tang iwei i samla pule ba la ïoh jaka ha thoh eksam ha Port Blair, kaba long ruh katkum ka jingkwah ne jied jong ki.
Kumba ka long mynta ki don artylli ki nongbah ha ba lah ban jied ha Meghalaya bad kumba 5 tylli ki nongbah ba lah ban jied ha Assam.
Haba ïadei bad ki jingduna ki center, u Mantri u la ong ba haba ïadei bad ka CUET (UG) 2025, ka NTA ka khlem kren bad ka sorkar jylla haba ïadei bad ki jingduna ki jaka thoh eksam ha ka jylla. Kane ka kam ka la paw ha ka khyllipmat kaba khatduh haba bun na ki samla pule ki la ïoh ki jaka thoh eksam shabar ka jylla Meghalaya.
Ka NTA ka la ïakren bad ka Tata Consultancy Services (TCS) kum ka agency ba don jingkitkhlieh haba ïadei bad ki jingtreikam jong ki computer-based test center.
Ha kajuh ka por u commissioner & secretary u la ong ba ka tnat Pule Puthi u la pynpaw ka jingïaroh halor ki jingkyrshan jong kiba bun ki skul bad college ha kylleng ka jylla Meghalaya kiba la wan shakhmat haba ïadei bad ki computer lab jong ki ban pynlong ïa ki NTA exam. Hynrei katto katne ki jaka pule ki khlem pat ai ki jingkyrshan jong ki na ka daw ki jingduna ki jingdon ki computer-based exam center.
U la ong ba ka NTA ka kyrmen ba baroh ki samla pule kiba dei ban thoh ïa ki eksam hadien ka 16 tarik mynta u bnai, kiba la jied ïa ki jaka thoh eksam ha Meghalaya hynrei ki la ïoh pat ïa ki jaka thoh eksam shbar ka jylla, kin sa ïoh biang ki jaka thoh eksam ha la ka jong ka jylla Meghalaya, kaba long ruh katkum ka jingdon ki jaka bad ka jinglah ban pyndep ïa ki kam kiba donkam.
Ha kaba ïadei bad kane na ka liang ka tnat Pule Puthi kan sa pynthikna lashai ne hadien ki katto katne sngi.
“Ka sorkar jylla ka ïaitrei ïa ka kam ban pynthikna ba baroh ki samla pule na Meghalaya kin ïoh ka lad ban thoh ïa ki eksam ka national-level kum ka CUET.